Shillong, Lber, 13: Ka Executive Commitee kaba mynta kaba la ïalam da ka seng NPP hapoh KHADC lyngba u Executive Member (EM) ba dei peit ïa ka tnat Building ha ka Khasi Hills Autonomous District Council (KHADC) u Bah Teibor Pathaw ula pyntip ba haduh mynta ka tnat kala ai haduh 263 tylli ki jingbit ne permission ban tei ïing hapoh u pud u sam jong ka.
Ïa kane u la jubab ïa ka jingkylli ba la wanrah da u Nongïalam ka Liang Ïatei u Bah Titosstarwell Chyne, u Bah Teibor ula pyntip ruh ba ki don sa 174 tylli ki aplikeshon ba pan jingbit ban tei ïing ba ka tnat kam pat ai jingbit namarba kim pat sdang ïa ka kam bad ba kin hap ïaid katkum ka Building Bye Laws bad kiwei ki jingdonkam.
U EM ula ïathuh ba ka tnat ka don da ka Committee jong ki Engineer bad kiwei stad ki riewshem phang ban bishar bniah ïa ki aplikeshon ba pan jingbit ban tei ïing bad ula pyntip ruh ba ka tnat ka shim jingïarap na kiwei ki stad na bar jylla haba ïadei bad ka jingbishar bniah ïa ki aplikeshon bad ïa ki jingpynwandur jong ki ïing kiba kham heh bad ha kane kin donlang ruh ki briew napoh ka jylla ki ban khmih lang ïa kane ka bynta.
“Nalor ki 263 tylli ki jingbit (permission) ba la dep ai ban tei ïing, ka tnat ka dang bishar bniah sa ïa ki 174 tylli ki aplikeshon bad ïa ki rukom tei ïing kaba ka tnat kala ïohpdiang ha u snem 2022-2024,” ong u Bah Teibor.
Haba shim bynta ha ka jingkylli, u MDC ka Mylliem u Bah Ronnie V Lyngdoh u la ai jingmut ïa ka Executive Committee (EC) bad ïa ka tnat ba kam dei ban ai jingbit (permission) ban tei ïing ha ki jaka markhap bad ki rud Wah.
Haba jubab, u Bah Teibor u la ong, “Ka tnat ka bud ryntih ïa ka hukum ba la pynmih da ka Meghalaya High Court ban ym shah ban tei ïa ki jait jingtei marjan ki wah bad na ka liang ka tnat nangne shakhmat kan peitngor bad kan pyrkhing bha ban pynthikna ba ki nongshong shnong kim dei ban kyntur pud ha jan ki wah da ka ba tei ïing”.
Ha kaba ïadei pat bad kito ki ïing kiba la tei naduh shwa u snem 2023 hadien ba la shimti ka KHADC ban ai jingbit na ka liang u EM u la ong ba kitei ki ïing kin hap ban wanrah ïa ki jingthoh na ki nongïalam shnong ban pynshisha ba ki la shna ïa ki ïing shwa katei ka snem.
U la ong ruh ba na ka liang ka tnat ka la lum ïa ki Nongïalam shnong ban pynsngewthuh ïa ka building bye laws ha shwa ban pyntreikam bad kumjuh ka la don ka team kaba leit jurip haba ïadei bad kane ka kam.
