25% ka Seat ha ki skul Private ka dei ka hok jong ki khynnah baduk katkum ka RTE Act

Shillong, Jylliew 01: U Swapnil Tembe, IAS Secretary, ka tnat Pule puthi ka sorkar jylla bad u State Project Director, SEMAM, Samagra Shiksha ha ka jingkren jong u la pyntip ba katkum ki kyndon ba la buh ha ka Section 12(1)(c) jong ka RTE Act, la ong ba ka long kaba kongsan bad kaba donkam ïa ki skul shimet kiba khlem ïoh ki jingïarap (non-minority) ki dei ban pynrung klas ïa ki khynnah kiba wan na ki longïing kiba duk bad kiba tlot ka ïoh ka kot bad ki kynhun kiba kiba duk jong ka imlang sahlang ha ka Class- I bad ban pynïar la kumno kumno 25% jong ka jingheh jong ka class, bad ki khynnah kiba wan na ki longïing kiba tlot ka ïoh ka kot ba kynthup ïa ki ST, SC, ki khynnah kiba pang HIV, bad ki khun swet bad kiwei kiba sah marjan ba ki dei ban ïoh ka pule puthi kaba khlem donkam ban siew bad ban ïoh ruh ïa ka compulsory elementary education tat haduh ba kin da pyndep bad kane ka long ruh katkum ki kyndon ba la buh hapoh ka Section -12(1)(c) jong ka Right of Children to Free and Compulsory Education Act, 2009.
Ka State Education Mission Authority of Meghalaya (SEMAM), Samagra Shiksha, ha ka jingïatreilang bad ka Indus Action, ka la pynlong ïa ka prokram pynsngewthuh bad ka training programme na ka bynta ki nongshong shnong jong baroh ki 12 tylli ki district jong ka jylla. Kane ka prokram ka pynleit jingmut halor ka jingpyntreikam ïa ka Section 12(1)(c) jong ka Right of Children to Free and Compulsory Education (RTE) Act, 2009, ha kaba la pynlong ha DERT Annexe, Shillong, naduh ka 27 tarik haduh ka 30 tarik u Jymmang.
Ha ka prokram plie nalor u Swapnil Tembe, IAS, uba la long kum u kongsan la donlang u Bah Banteilang J. Kharshandi, MCS, Director of School Education and Literacy bad Deputy State Project Director, SEMAM, Samagra Shiksha; u Dr. Andrew Warjri, Officer on Special Duty, Samagra Shiksha.
Kiba la ïashim bynta ha kane ka prokram kaba 4 sngi ki kynthup ïa ki ophisar na ki tnat pule bapher bapher, kum na District School Education Officer, Sub-Divisional School Education Officer, District Mission Coordinator, Block Mission Coordinator, State, District and Block MIS Coordinators, bad ka kynhun ki nongai jinghikai na Indus Action.
Haba batai halor kane, u Tembe u la ïathuh ba baroh ki skul shimet kiba khlem ïoh ki jingïarap hynrei kiba la ithuh ha ka jylla ba ki dei ban buh ka bhah kumba 25% ki seat jong ki kaba sdang ka jingpynrung klas naduh ka kyrdan class 1 shakhmat na ka bynta ki EWS bad ki khynnah pule ha ka kyrdan DG. U la banjur da kaba ong ba ka jingpule lang ha ki kamra klas kan wanrah ka jingïalong sngewjan, kan pynkut ïa ka jingshah ñiew beiñ bad ki jingshah kheiñ poh ïa ki khynnah kiba wan na ki longïing kiba duk ha ka imlang sahlang, bad ban pynkhlaiñ ka jingïateh hapdeng ki khynnah skul.
Na ka liang u Bah B. Kharchandi, MCS u la pynpaw ba da ka jingpyntreikam ïa kane ka kyndon, kan ïarap ïa bun ki longïing kiba duk bad ïa ki khynnah skul na kylleng ka jylla ba kin ïoh ka lad ban leit skul da kaba khlem siew bad ka jingpule kaba long kaba kongsan bad kaba donkam. Kane ka kyndon kan pynthikna ba ki khynnah na kine ki kynhun ki dei ban ïoh ka pule puthi kaba bha khlem da mad ïa ka jingsiew kaba khia.
U la kyntu ïa baroh ki nongshong shnong, kynthup ïa ka District Education Department, ki skul shimet, ki kmie ki kpa, ki nongri nongsumar bad ki shnong ki thaw ban wan shakhmat bad ban ïatreilang ban pyntreikam ïa ka RTE 12 (1)(c).
Ïa kane ka prokram la pynlong da ka jingthmu ban wanrah ka jingpynsngewthuh, ban ai jinghikai ïa ki ophisar, bad ban pynlong ïa ki nongshong shnong ban ïatreilang khnang ban lah pyntreikam ïa ka RTE, Section 12(1)(c). Ban pynkhlaiñ ïa ka jingtreikam, ka web portal ba la khot ka RTE Meghalaya Portal la dep ban thaw na ka bynta ban tip ïa baroh ki application bad ka kam pynrung kyrteng. Kane ka rukom treikam kan pynsuk ïa ki samla pule ban pynrung kyrteng ha ki klas, nangta ka jingpynrung kyrteng ha ki skul, ki rukom treikam ka tnat bad ki kam ban khmih bad bishar kam.
Kane ka portal kan ïarap ban ai ka jingkitkhlieh ïa baroh ki nongshong shnong da kaba pynsuk ïa ki kam application bad ka kam pynrung kyrteng, nangta ban pynsuk ïa ki kam pynïaid kam, ban pyndon ïa ki lad ban khmih haba don ki jingeh, nangta ki rukom treikam kiba ïaid beit bad kiba shai da ki jingkheiñ kiba biang.