Shillong, Naitung 21: Kum shi bynta ban ïarap na ka jingïakhih kaba la jia ha ri Bangladesh, ka India ka la pynbna ba kan plie 24 kynta ïa ki khappud jong ka khnang ba kan long kum ka jingpynsuk ïa ka jingwan rung jong ki nong India kiba la sahkut ha katei ka ri.
Kane ka rai ka la mih ha kane ka sngi hadien ba la ïohi ba ka jingïakhih ne jingïakynad ha katei ka ri ka la nangjur bad kumta ka sorkar ka la rai ban plie 24 kynta ïa ki khappud jong ka ri bad ka Bangladesh.
Ha kaba ïadei bad kane na ka liang ka tyllong khubor ba la ïoh na ki BSF ki la pynthikna ba ki khappud jong ka ri kiba don ka jingpynïasoh bad ka ri Bangladesh kin plie 24 kynta bad kane kan ïarap ban pynsuk ïa ka jingwan rung jong ki samla pule bad ki nongshong shnong ba kin wanphai sha India.
Lah ban ong ba kane ka jingïakhih hapoh ka ri Bangladesh ka la mih na ka jingthmu ka sorkar ban bhah kam kyrpang ïa ki bahaïing jong kito kiba la ïakhun ha ka thma laitluid jong ka ri Bangladesh bad kane ka jingïakhih ka la neh mynta la kumba 3 taïew.
Na ka liang ka High Commission jong ka India kaba don ha Dhaka, ha ryngkat bad ka ophis Assistant High Commission kaba ha Chittagong, Rajshahi, Sylhet, bad Khulna, la ïathuh ba ki la treikam 24 kynta ha kaba ïadei bad kane ka jingjia. Ïa kine ki kam la ïatreilang ba ki bor pynïaid jong ka Bangladesh ban pynsuk ïa ka jingwan phai lyngba ki khappud jong ka ri India-Bangladesh. Ka Ministry of External Affairs (MEA) ha ka jingïatreilang bad ka civil aviation, immigration, land ports, bad ki bor pynïaid BSF ki la shimkhia ban pynsuk ïa ki nongshong shnong ban wanphai da kaba suk ba saiñ sha ka ri.
Na ka bynta ki lad jingïarap ki samla bad ki nongshong shnong ka ri ki lah ban phai sha ki emergency contact number ba la pynbiang da ka High Commission bad Assistant High Commissions ha ri Bangladesh.
