Shillong, Jylliew 26: U MLA/MDC jong ka Mawhati Constituency u Bah Charles Marngar ha ka sngi Saitjaiñ u la ïathuh ba ki don 22 tylli ki shnong kiba hap hapoh ka thaiñ Block-2 ba la shong la sah shi spah na ka shispah da ki Khasi, ki ladep phah da ka jingthoh sha ka Sorkar Jylla ba ki kwah ban don hapoh ka Jylla Meghalaya.
U Bah Charles Marngar uba long ruh u dkhot jong ka Regional Committee na ka bynta ka Ri Bhoi District u la pynpaw ba ïa ka jingangnud ban ïai neh hapoh ka Jylla Meghalaya la soi lut da baroh ki longiing Khasi kiba don ha ki 22 tylli ki shnong ka thaiñ Block-2.
Katkum ka jingïathuh jong u Bah Charles, na ki 22 tylli ki shnong kiba don hapoh ka thaiñ Block-2 tang kawei ka shnong ka dei kaba la buhai shnong da ki jaidbynriew Tiwa.
Ha ka jingïakren bad ki lad pathai khubor u Bah Charles Marngar u la pyntip ba ïa ki jingpynsngew bad ki jingdawa jong ki ladep aiti sha ka Regional Committee ba la khlieh da u Symbud Myntri Rangbah u Bah Prestone Tynsong uba long ruh u Chairman jong ka Comittee.
“Da ka jingïatreilang jong nga ryngkat bad ka Synjuk ki Rangbah Shnong, ngi dei beit ban hap hapoh ka Jylla Meghalaya kumba ngi ju long,” u la ong.
“Nga la ong u Symbud Myntri Rangbah ba aipor ïa ngi ban lum ïa ki dulir katba ngi dang ïoh bad kiwei kiwei ruh kiba la nga pynsngew ba ngin ym duh ïa ka khyndew ka shyiap jong ngi (ha ka jingïakren pynbeit pud ha ka wat kaba ar) bad yn sa rah pat ha ka jingïalang ka ban sa long jong ka Regional Committee,” u la ong
“Ngan sa thoh sha ka Khasi Hills Autonomous District Council (KHADC) ba kan phah da ka jingthoh sha ka Regional Committee bad ma nga shimet lem bad ka Synjuk ki Rangbah Shnong ruh ngin sa phah da ka jingthoh khnang ba ka Regional Committee kan dup ïoh ban leh ïa kaba donkam,” la pynpaw u Bah Charles.
“Nga sngewtynnat ba u Chairman jong ka Committe u la sngap ïa ki jingai jingmut bad nga khmihlynti ba ka Sorkar kan nang lum jingtip shuh shuh ïa ki kot ki sla ba ngin dup lah ban wanrah ïa ki 22 tylli ki shnong ba kin neh kin sah hapoh ka Jylla jong ngi,” la bynrap u Bah Charles.
Haba kylli, u Bah Charles u la ong, “haduh mynta kam don kano kano ka jingïakajia hynrei ha kaba ïadei bad ka jingshah ktah ki nongrep, nga la kren ha Assembly bad na ka liang jong u Myntri Rangbah ka Jylla u la ïakren bad ka Karbi Anglong Autonomous Council (KAAC). Nga la ïoh pdiang ïa ka shithi ba ka KHADC ka ladep phah da ka jingthoh sha ka KAAC.”
“Hadien ba nga la pynïasoh bad ka Executive Committee kaba thymmai na ka liang jong u Chief Executive Member (CEM) Bah Pynïaid Syiem u ladep ai da ka jingkular hapoh ka Ingdorbar bad ha ka jingkren ha ka Dorbar Mang Tyngka ba un shimkhia ban leit jngoh (ïa ki paidbah kiba sah ha Block-2),” u la pynpaw
“Ban ïakren nangne ngin ym sngewthuh bad nga da kwah eh ba kane ka EC ba thymmai kan da leit jngoh hi da lade bad ngan ïalam ruh ïa ki khnang ba ki paidbah jong ngi ynda ngi la wan phai kin ym ïakynduh jingeh,” la pynpaw u Bah Charles.
Ha kaba ïadei bad ka jingbat ar tylli ki EPIC jong ki briew kiba sah ha khappud, u Bah Charles u la ong, “ha ki por ba mynshwa na ka daw ba ki briew jong ngi ki don hapdeng ka jingtieng ka jingsyier kim banse ban shim lang ïa ka EPIC na ka Jylla Assam khnang ban ym pyndik ïa ki.”
“Dei ha ka por ba nga la shah jied kum u MDC, nga la phah da ka jingthoh ba kim dei shuh ban dang pynrung kyrteng ïalade ha ka Electoral Roll jong ka Assam. Nga sngewkmen ba ha ka elekshon jong ka Karbi Anglong Autonomous Council (KAAC) ki nongthep vote Khasi jong ngi kim shym la don shuh. Lehse iwei ne ar ngut ki lah ban don. Nga kyrpad ïa ki paidbah (kiba sah ha Block-2) ba kin dei ban long tang shisur,” u la ong bad bynrap, “khnang ba ka jingïapynbeit pud kan long kaba suk.”
