Shillong, Risaw 30 : Ka kynhun ïalehkai jong ka Mawpat Jabs ka la ïohrah ïa ka song pisa ba 20 hajar tyngka da kaba ïoh rah ïa ka nam lahduh ïa ka lympung ïalehkai phutbol Futsal League Champions 2022 ba la pynïaid da ka BJP Mandal Golflink Circle.
Ka Mawpat Jabs ka la ïoh rah ïa ka nam lahduh hadien ba ka la pynliem noh da 3-1 kol pyrshah ïa ka Mawpat Combine ha ka jingïakhun phainal ha ka janmiet sngi Saitjaiñ ha madan Futsal kaba don ha Polo, Shillong.
Nalor ka song pisa ba 20 hajar tyngka ka Mawpat Jabs ka la ïoh ruh bad ka trophy, katba ka Mawpat Combine kaba wan ba ar ka ïoh 10 hajar tyngka ha ryngkat ka trophy.
Ïa katei ka lympung ïalehkai la wan ban pynhap pyrda noh da u Bah Adwin Swer kum u kongsan ha ka jingïadonlang ryngkat u Bah Pradip Blah symbud kongsan, nangta u Bah AL Hek MLA ka Pynthor-umkhrah kum u special guest. Ka jingpynlong ïa katei ka lympung kadei shi bynta ka jingrakhe ïa ka jingdap 25 tylli ki snem ka jingshakri u Bah AL Hek kum u nongmihkhmat jong ka Pynthorumkhrah Con-stituency.
U Bah Edwin Swer haba kren kum u kongsan u la ai khublei ïa u Bah Hek bad ong ruh ba kam long kaba suk ban ïoh shakri ïa u paidbah haduh 25 snem. U la kitbok kitrwiang ba ym tang 25 snem hynrei un dang lah ban ïoh shakri wat haduh 50 snem. Ha kane ka sngi la pynkup burom ruh ïa ki samla jong ka thaiñ kiba la wanrah nam bad burom na ki rynsan bapher bapher.
