2.58 klur tyngka ka skim MLA pyllait paidbah u Bah Renikton ha Mawkyrwat

Mawkyrwat, ‘Nailur 09: U bah Renikton Lyngdoh Tongkhar, MLA ka Mawkyrwat Constituency mynta ka sngi ka 9 tarik u ‘Nailur, 2024 u la ïoh ban pyllait paidbah ïa ka MLA Scheme kaba dei jong u snem 2023 – 2024 kaba kot T. 2 klur 58 lak ha ka jingsakhi lang jong ki paidbah ha ka jingïalang ba la long ha phyllaw ka ophis treikam jong ka United Democratic Party (UDP) Mawkyrwat Constituency.
Ki skhim ba la pyllait paidbah ki kynthup ïa ka Special Rural Work Programme (SRWP) kaba kynthup haduh 52 tylli, ka Intensive Arts & Culture Development Programme (IA&CDP) kawei, ka Development of Traditional Folk Music’s (DTFM) 3 tylli bad ka Intensive Sports & Youths Development Programme (IS&YDP) kawei.
U bah Renikton Lyngdoh Tongkhar haba kren ha ka jingïalang u la ong ba ka jingpyllait paidbah ïa ka MLA Scheme mynta ka sngi ka la kot haduh 2 klur 58 lak tyngka kata kaba kynthup ïa ka Special Rural Work Programme (SRWP), ka Intensive Arts & Culture Development Programme (IA&CDP), ka Development of Traditional Folk Music’s (DTFM) bad ka Intensive Sports & Youths Development Programme (IS&YDP).
U la pynpaw ruh ba kane ka long kaei kaei ka sngewtynnad ban ïoh ban pyntip ba ki nongïoh jingmyntoi na kane ka MLA Scheme ba la pyllait paidbah mynta ka sngi kynthup kiba ïoh shimet ne ki kynhun ruh haba kheiñ ka la kot haduh 1000 ngut thik kata ki ban ïoh jingïarap ha ka rep ka riang ki long 702 ngut, ki ban ïoh ïa ki tin sop ïing ki don 200 ngut, ki ban ïoh ïa ki tiar mistery ki don 13 ngut, ki kor suhjaiñ 10 tylli, ki tiar pynsawa 10 set, ki kali kit met ïap kumba 10 tylli, nangta kumba 45 tylli na ka bynta ki kynhun ne group ha ka liang ki jingtei bad na ka bynta ki SHGs.
“ïa ki skhim shimet khamtam eh na ka bynta ki nongrep mynta ka kynti la pynkiew na ka 10 hajar sha ka 15 hajar khnang ba ki nongrep kin ïoh ban pynïaid shaphrang ïa ka kam rep kam riang jong ki”, ong u bah Renikton. Namarkata, u la ong ba watla ka long ka jingai kaba rit hynrei kan long ka jingmyntoi na ka bynta jong baroh kiba ïoh pdiang na kane ka MLA Scheme.
Shuh shuh ula ai ruh ka jingkitbok kitrwiang na ka bynta jong baroh, ba kumba la mang ban ai 100% bad kumba la kubur na ka ophis u BDO ba ha ka jingmang kam shym la don kano kano ka jingïatuklar hynrei kaei kaba la dep ban mang kan poi beit sha kita kiba dei hok ban ïoh. “Ka long kaba donkam ba ngin long ki briew kiba kmen, kiba pyrkhat ïa kaei kaei kaba dei, bad kiba hun ha ka jingpynïaid jong U Blei ba stad namar ka long kaba bha suda watla teng teng ngi don ka jingkhñium ha ka jingim”, u la ong bad kumta u la pynpaw ka jingaikhublei na ka bynta ki paidbah nongshong shnong ryngkat ka jingkyrpad ba kin don ka jingïatreilang ha ki bynta baroh khamtam ban pyntyllun ïa ki kam kiba ïa dei bad ka roi ka par ha ki shnong ki thaw.
Kiwei de ki nongkren ki long u bah Tarius Nongbsaw, u bah Kynsai Diengdoh, SA na ka ophis u BDO jong ka Mawkyrwat C&RD Block, u bah S.K. Budnah, Chairman jong ka MPDA ula long u nongpynïaid ïa ka jingïalang bad jingkren khublei na u bah Phrangkupar Kharsyiemiong, Secretary jong ka MPDA.