Jowai, Risaw 22: Ka lympung ïalehkai phutbol kaba la tip kum ka “Chatister Kharkongor Memorial Trophy 1st Division Football Tournament – 2023 bala pynïaid da ka West Jaiñtia District Sports Association, (WJDSA) Jowai kaba la long hynnin ka sngi saitjaiñ ha madan Kiang Nangbah Stadium, Dongmihsngi Jowai.
Haba phai sha ka jingïakhun ka kynhuh ïalehkai jong ka Moosalyngkat kala lah ban khur namjop hadien ba ka la pynliem sakit da 1-0 ïa ka Khliehïongriang.
Haba bishar ïa ka jingïalehkai jong kine ki ar kynhun, ka la long kaba itynnat bad kaba ïakhaid ha kaba baroh ar kynhun ki la ïakhun tyngeh ban ïoh pynkhihjar. Kane ka jingbymlah thep kol ka la bteng shi slem wat sha ka kylla miet, hynrei hashwa ba ka jingïalehkai kan jam sha kaba kut, ka Moosalyngkat lyngba u Edious L. Laloo ka la ïoh ban thep jlang ïa ka shi kol (90+2) kaba la biang pura ïa ka kynhun ban khur ïa ka namjop.
La pyntip ba ka jingïakhun mynta ka Lah Sngi U Blei (23 tarik Risaw, 2023) kan long hapdeng ka Dulong pyrshah ïaka Luti Tuber SW ka ban sdang ha ka por 12 baje shiteng sngi.
