Jowai, Risaw 10: Ka lympung ïalehkai jong ka kyrdan 1st Division Football Tournament, 2022 ïa kaba la ai kyrteng ka ‘Chatister Kharkongor Memorial Trophy’, kaba la long mynta ka sngi ha madan Kiang Nangbah Stadium Dongmihsngi, Jowai.
Ïa kane ka lympung la pynïaid da ka West Jaiñtia District Sports Association (WJDSA) shi bynta na ka jingrakhe jubilee ksiar jong ka Association kaba la jam sha u mawmer ba 50 snem jong ka jingshakri ban pynkiew ïa ka kam ïalehkai Sports hapoh ka District.
Haba phai sha ka jingïakhun mynta ka sngi ka la poi sha ka jingïakhaid da mar shikol (1-1) hapdeng ka kynhun ïalehkai jong ka Wahiajer SC pyrshah ïa ka Nangbah Iawmusiang SC. Ïa ka kol na ka Wahiajer SC la thep da u Dawhoi Dhar haka minit ba 52, katba na ka liang ka Nangbah Iawmusiang SC la thep da u Wanbiang Passah ha ka minit ba 38.
Ka jingïakhun lashai ka sngi 11 tarik kan long hadpeng ka Mukhla Evergreen SC pyrshah ïa ka Mukhla Raij SC ha ka por 2 baje shiteng jong ka nohphai sngi.
