Yn shah pyn tbit ïa lade ki 30 ngut ki khynnah ha ka Khelo India, ïoh ka Nativity HSSM kum ka jaka ai jinghikai

Mawkyrwat, Risaw 10: Ka Nativity Higher Secondary School, Mawkyrwat ha kine ki sngi kan sa long kawei na ki jaka ai jinghikai ne Center na ka bynta ka jingai jingïalehkai ha ka ‘Khelo India’ ha kaba ha kane kin sa don kumba 30 ngut ki khynnah kiba la shah jied ban shah ai jinghikai pyntbit ïa lade na ka bynta kane ka jingïalehkai.
Ïa kane ka jaka ai jinghikai la plie pyrda da u bah L. Tariang, MCS, Additional Deputy Commissioner, South West Khasi Hills District uba long kum u kongsan bad u la ot ruh ïa u ribbon ïa ka “Khelo India Centre” ha madan jong ka Nativity Higher Secondary School, Mawkyrwat ha ka jingïadonlang u District Sports Officer (DSO), u bah Damang Syngkon, u Rev. Fr Venkey Friding Kharsyiemiong u ba dei ruh u Principal jong ka Nativity Higher Secondary School, Mawkyrwat ryngkat da ka jingïasakhie lang ki khynnah skul, ki nonghikai.
Ïa kane ka prokram la pynshit pynshngaiñ shuh shuh da ka jingshad na ki khynnah skul jong ka Nativity Higher Secondary School, Mawkyrwat.““Lah ban kdew ba hapoh jong ka South West Khasi Hills District ki la ïoh ban buh ar tylli ki jaka kata ha ka Madan jong ka Nativity Higher Secondary School, Mawkyrwat bad ha ka Maharam Government Higher Secondary School, Mawkyrwat.
Shuh shuh na ka bynta ban ai jinghikai ïa ki khynnah ba 14 snem haduh 16 snem na ka bynta ka jingïasiat khnam ne ka Archery bad na ka bynta ka Athletics kata haduh 4 snem lynter ki ban sa shah ai jinghikai pyntbit na ki ar ngut ki Nonghikai kata u bah Jomsingstar Ramsiej bad ka kong Badasharai Marweiñ.““Dur: U bah L. Tariang, MSC, ADC katba i dang ot ïa u ribon ban plie ïa ka jaka ai jinghikai ha ka Khelo India.