18 tarik yn sdang ïakhun nyngkong ka Nongthymmai bad ka Rangdajied ha ka Shillong Premier League

Shillong, Lber 13: Ka Shillong Sports Association ka la pynbna ba kan sa sdang ïa ka lympung Shillong Premier Division Football League Tounament 2023 naduh 18 tarik mynta u Lber ha madan SSA Stadium, Polo.
Ka lympung kan ïaid katkum ki kyndon jong ka Shillong Sports Association Football League Tounament kiba ju pynlong barabor man ka samoi, bad ka por ïalehkai la phiah mar 45 minit kawei ka kylla.
Ki kynhun ban ïakhun mynta ka kynti ki kynthup ïa ka lahduh jong ka samoi ba ladep (2022), ka Mawlai SC, ka Nangkiew Irat SC, Shillong Lajong SC, Langsning SC, Ryntih SC, nangta ka lahduh jong ka Meghalaya State League- ka Rangdajied United FC, lem bad ar tylli ki kynhun ba dang kiew kyrdan na ka lympung First Division ba kynthup ïa ka Nongthymmai SC bad ka Sawmer SC.
Ka jingïakhun kaba nyngkong ka ban sa plie pyrda ïa ka Shillong Premier Division Football League Tounament 2023 ha katei ka sngi (18 tarik) kan long hapdeng ka kynhun ba dang shu kiew na ka 1st Division, kata ka Nongthymmai SC pyrshah ïa ka lahduh jong ka Meghalaya State League- ka Rangdajied United FC ha ka por 3 baje nohphaisngi, ha SSA Stadium, Polo.
Katkum ki kyndon ïalehkai jong ki League Tournament, tang saw tylli ki kynhun ba wan hakhmat kin ïohrung sha ka Semi-Final. Ka lahduh jong kane ka Championship kan ïohpdiang ïa ka buskit kaba haduh 3,00,000/- tyngka ryngkat bad ka Trophy, katba ka kynhun ba wan ba ar kan ïohpdiang 1,50,000 tyngka. Ha man ki jingïalehkai, ki kynhun ki lah ban bujli player (subsitution) tang san ngut.
Wat hadien ba ka SSA dangshen ka la pynbna paidbah ban sdang ïa kane ka lympung ha ka 20 tarik, hynrei namar ka jingtyngkhuh bad ka lympung I-League, ha kaba ka TRAU-FC kan pdiang ïa ka jingïalehkai pyrshah ïa ka Neroca la 21 tarik mynta u bnai ha madan SSA Stadium kum ka jingïalehkai hala ïing namar ka jingbym shongshngaiñ ha jylla Manipur. Na kane ka daw ka SSA ka la hap ban pynkynriah noh ïa katei ka sngi sdang.