18 ngut ki MDC na KHADC ki ban aireng ha ka elekshon MLA kynthup u CEM bad Dy.CEM

Shillong, Risaw 05 : Ki la don haduh 18 ngut ki MDC tang na ka Khasi Hills Autonomous District Council (KHADC) kiba la pynkhreh shaid shaid ïalade mynta ban aireng ha kane ka elekshon MLA kaban long ha u Rymphang – Lber jong u snem ban wan.
Na kitei ki 18 ngut, arngut ki dei ki longkmie, kata ka Kong Grace Kharpuri ka ban aireng na Shella bad kawei pat dei ka Kong Macdalyn Sawkmie Mawlong kaban ïakhun na Nongpoh.
Tang na East Khasi Hills, na ki 17 ngut ki MDC haduh kumba 12 ngut ki la dep ban pyntikna ba kin aireng ha kane ka elekshon, kata kynthup ïa ki arngut kiba bat lang kum ki MLA kum u Bah Pynïaid Sing Syiem na Mawryngkneng bad Bah Lambor Malngiang na Nongkrem.
Ki 10 ngut kiwei pat ki kynthup ïa u Chief Executive Membere (CEM) Bah Titos W Chyne uban ïakhun na Sohra constituency, nangta Bah Martle N Mukhim na Mawkynrew, Kong Grace Kharpuri na Shella, Bah Alvin Sawkmie na Mawsynram, Bah Ronnie V Lyngdoh na Mylliem, Bah Mitchel Wankhar na Mylliem, Bah PN Syiem na Pynthorumkhrah, Bah Paul Lyngdoh na Shillong West bad Bah Teibor Pathaw na Mawlai.
Ha kane ka kynti kaba mynta wat u MDC ba shu sieh jong ka Council, Bah Bindo M Lanong ruh u la pynkhreh ban aireng lang na Nongkrem lada ïoh ne ym ïoh tiket ruh na ka UDP.
Na kane ka distrik, na kitei ki 12 ngut, saw ngut kin ïakhun na ka NPP, saw na ka UDP, arngut na ka Congress, uwei na ka HSPDP bad uwei pat u lah ban ïakhun na kawei ka party lane kum u kyrtong shimet.
Ha Ri Bhoi pat na ki san ngut ki MDC, arngut ki la pyntikna ban aireng kata i Kong Macdalyne Sawkmie Mawlong kaban ïakhun na ka tiket NPP na Nongpoh bad uwei pat dei u Bah Charles Marngar na ka tiket Congress na Mawhati.
Kumjuh ha West Khasi Hills na ki san ngut ki MDC, arngut ki MDC kiba la pyntikna kata u Bah Gabriel Wahlang uban ïakhun na ka Congress na Nongstoin bad uwei pat dei u Bah Gigur Myrthong Deputy CEM uba dei ruh u MLA ba mynta uba pynkhreh ban ïakhun biang na ka ka tiket NPP. Katba u Bah Batskhem Ryntathiang MDC ka Mairang haduh mynta um pat pyntikan la un aireng ne kyrshan noh ïano ïano ha kane ka elekshon ban wan.
Ha South West Khasi Hills pat na ki arngut ki MDC baroh arngut kin aireng kata kynthup ïa u MDC ka Congress na Mawkyrwat Bah Carnes Sohshang bad uwei pat dei u Bah Pius Marwein ba dei ruh MLA ba mynta jongka UDP.
Kumta lada khein lang baroh, ki MDC kiban ïa khun na ka tiket NPP ki long 6 ngut, na ka UDP ki long san ngut kumjuh na ka Congress ruh ki long san ngut, uwei na ka HSPDP bad uwei pat kum u kyrtong shimet lane na kiwei kiwei ki party.
Ha kajuh ka por, u Chairman ka Council Bah Lamphrang Blah u la hap ban shong bad kyrshan noh ïa u kyrtong ka NPP na Mawphlang katba u Dy Chairman pat Bah Alvin Sawkmie u la mih shakhmat ban aireng na ka tiket NPP na Mawsynram.