Shillong, Ïaiong 10 : Ka Nan Polok kaba dei kawei na ki jaka jngohkai ba pyngad bad kaba khring bha ïa ki nongwan kai kan sa kylla dur noh hadien ba ka sorkar jyla ka la thmu ban pynlut haduh18 klur tyngka ban pynbha bad pynbiang shuh shuh ïa ki jaka shongkai pyngad na ka bynta ki nongwan jngohkai sha Shillong.
Haba kren bad ki lad pathai khubor ha kane ka sngi Palei, u Myntri ka tnad Tourism ka sorkar jylla, Bah Paul Lyngdoh u la ïathuh ruh ba mynta ka kam ka la ïaid shakhmat ban aiti biang ïa katei ka jaka jngohkai kaba ju tip ruh kum ka Wards Lake, na ka tnad Forest and Environment Department sha ka Tourism Department.
“Ka Wards Lake kumba phi tip, wat ka jingkieng, ka long kaba kham phylla bad long ka shap jong ka Meghalaya, ka la don bad ka Tourism Department hynrei na ka daw ki katto katne ki daw, la peit noh da ka Forest Department,” ong u Myntri haba kren bad ki lad pathai khubor.
Shuh shuh u la ïathuh ba ha ka jingïalang kaba la pynïaid da u Myntri Rangbah ki la shim ïa ka rai ba yn peit biang noh da ka tnad Tourism ïa katei ka jaka jngohkai.
“Katba ngi dang kren mynta, ngi la dep ruh ban mang haduh 18 klur tyngka na ka bynta ban pynkylla dur bad pynitynnad shuh shuh ïa kane ka jaka jngohkai da kaba kynthup naduh ki cafe, ki jingpynbyrngia bad kiwei kiwei,” u la ong.
Nangta u ola ong ruh ba ka por ban khang ïa kane ka jaka jngohkai la pynjlan na ka 5baje janmiet sha ka 10baje mynmiet.
U Myntri u la ong ruh ba hadien ba ki la shimti pura ïa katei ka jaka, kin pyntikna ba ka por plie por khang kan kylla. U ong ruh ba kane kan plie lad ruh kham kylluid ka por ïa ki nongwan kai nalor ka jingpynbiang ia ki jingpynbyrngia kiba ki nongwan ki ju khmih lynti ba kin don ha ka por janmiet.
“Kane kan ïarap ruh ïa ki nongtrei sorkar jongngi namar kumba phi tip ka por khang ophis kadei 5baje janmiet bad ka Lake ruh ka khang 5baje, kumta kine kin ïohlad ban leit ïaid kai pyngad sawdong bad ruh ban kilan met ïalade,” u la ong.
Halor ka jingkylli, u Bah Paul u la ong ruh ba ka bynta kaba kham kongsan ba kin leh hi kadei ka jingpynbiang ïa ki jingpynbyrngia kaban khring ïa ki paidbah.
“Ngin sa don ki prokram, kum kiwei ki nongbah ba la kham kiew ki la ïaid shakhmat.”
