Shillong, Risaw, 04: Kum ka dak jong ka jingrakhe ïa ka Seva Pakhwada bad ïa ka lyngkhuh sngi kha jong u Mahatma Gandhi ha ka 2 tarik mynta u bnai u MP ka Rajya Sabha u Prof. Rakesh Sinha ryngkat lang bad u Bah Michael Kharsyntiew ki la leit jngoh ïa ka shnong Kongthong, ka shnong kaba hap hapoh ka Laitkroh-Khararshnong C&RD Block.
U Prof. Sinha uba la shimti ïa ka shnong Kongthong naduh ki snem ba la leit u la ai sngewbha sha baroh ki nongshong shnong da ki Copper Medal ba la oh shrong kyrpang ha ka dur jong u Myntri Rangbahduh ka ri u Narendra Modi bad ha ka jingdap 75 snem (Azadi Ka Amrit Mahotsav).
Ha kane ka sngi, u Prof. Sinha u la kular ba un sa mang pisa T. 50 lak na ka MP Scheme na ka bynta ban shna noh ïa ka surok kaba pynïasoh ïa ka shnong Kongthong bad ban plie paidbah ruh ïa ka khilon kaba la shna itynnat ha kane ka shnong.
Na ka liang jong u Bah Michael Kharsyntiew u la noh synniang da ka song pisa kaba T. 1.21 lak sha ka shnong Kongthong ha kaba la sakhi lang da u Sordar ka Raid Kongthong u Bah Teibor Lynrah, u Secretary u Bah Stogent Lynrah, u Samla rangbah u Bah Rothell Khongsit.
Ïa kane ka pisa la ai ïa ka shnong ba kan pyndon kam na ka bynta ban pynbha bad ban pynitynnat ïa ka shnong katkum ka rai lang jong ki nongshong shnong.
U Bah Michael u la kyrpad ruh ïa ki para nongshong shnong jong ka jylla kum ki Nongmihkhmat bad ki briew ba don ba em ba kin phaikhmat lem sha kane ka shnong kaba itynnad shisha bad kaba la pawnam bha ha kylleng ka pyrthei kum kata ka Whistling Village ne kynud ïawbei.
Ha kane ka sngi, u Bah Dapkupar Nongrum uba dei uwei na ki tyngshop jong ki phlim khasi u la noh synniang 50 tylli ki khiew thung syntiew kiba heh ban pynitynnad shuh shuh ïa ka shnong.
Kum ka jingrakhe ruh ïa ka sngi kha jong u Mahatma Gandhi, la pynlong ruh ïa ka jingpynkhuid shnong ha ka shnong Mawkhma, Sohrarim ba la pynbeit da ka skul Seng Khasi jong ka shnong.
U Prof. Sinha u la kular ruh ban ïarap ïa ka skul kum ka dak ban kyntiew ïa ka jingnang jingstad, khamtam ïa ka skul ba la shah ieh beiñ ha ka Sorkar Meghalaya.
La sakhi lang ha kane ka sngi da u State President jong ka BJP Meghalaya State Unit u Bah Ernest Mawrie bad kiwei.
