Ynda la sniew bad iwtung lut ki um ki wah, kumno phin leh? Buh jingkylli ka KSU

Mawkyrwat, Lber 21: Ka Khasi Students’ Union (KSU) jong ka Mawkyllut Unit ka dap da ka jingsngewkhia bad sngewsih halor ka jingbym suidñiew bad ka jingsahdien ka jingmut jingpyrkhat ki paidbah ka thaiñ ha kaba ïa dei bad ka khuid ka suba.
Ym tang kata, ki da buh ruh ka jingkylli ba, “Ynda la sniew bad iwtung lut ki um ki wah, Kumno phin leh?? kane ka long ka jingkylli kaba kum ki paidbah nongshong shnong ki hap ban pyrkhat nangne shakhmat.
Ka KSU ka pynpaw ba ki briew ki sngewtynnad ban pynkhuid tang ïa ka met bad ka ïing lajong, bad kheiñ dew thala pat ban leh khuid ïa ka mei mariang da kaba ki bret pathar ïa ki plastik, ki nep jot bad kiba bun ki jakhlia ki bym pyut ha ki lum ki wah.
Namarkata, ha ka 18 tarik u Lber, 2025 ka KSU Mawkyllut Unit naduh ki nongkitkam bad ki dkhot ki la hap ban leit pynkhuid ïa ka Wah Mawpon kaba don hajan ka Shnong Mawkyrwat, South West Khasi Hills District na ka daw ba ki briew ki bret pathar ïa ki jakhlia. Shuh shuh watla ka shnong ryngkat ka seng ki la ju maham na ka por sha ka por ïa kiba wan saitjaiñ ha kane ka wah ba kim dei ban bret ïa ki jakhlia hynrei kine ki briew pat ki leh kum bym don skhor.
“Ngi ju ong, ka khuid ka suba ka dei u thied ka jingkoit jingkhiah hynrei lada ka long ha kane ka rukom kumno ngin ïoh ïa kata ka jingkoit jingkhiah? Nalor ba kane ka wah ka dei ka tyllong um bam um dih ïa kiba bun tylli ki shnong ha ka thaiñ Mawkyrwat”, ong ka KSU bad bynrap da kaba ong, “Ka suk palat ban shu bret lyngkar ïa ki jaboh jabaiñ”.
Namarkata, ka Seng ka kyntu ïa ki paidbah ban ñiewkor bad sumar khuid ïa ka mariang, khamtam eh ïa ki tyllong umbam umdih.