Ha u Nohprah mynta u snem ynsa pyndep noh ïa ka ïew Polo, pyntip u Bah Sniawbhalang

Shillong, Lber 21: U Symbud Myntri Rangbah ka jylla uba khmih ïa ka tnat ki kam Pynroi sor u Bah Sniawbhalang Dhar u la pyntip ba ïa ka ïew ha Polo ne ka market complex yn sa lah ban pyndep noh ha u bnai Nohprah mynta u snem.
Haba kren sha ki lad pathai khubor ha ka sngi Thohdieng, u Bah Sniawbha u la ïathuh ba dang shen u la leit ban jurip ïa kane ka ïew ha Polo kum shi bynta ban pynsted ïa ka kam.
U la ong, “Ka dang don sa khyndiat ki kam kiba dang sahteng bad tang shu dep ban pynbeit ïa kine ngin sa plie noh ïa ka. Nga tharai ha u bnai Nohprah ngin lah ban pyndep ïa kane ka projek.”
Haba ïadei bad ki jingbuh ïa ki dukan, u Symbud Myntri Rangbah u la ong ba shen ka tnad kan sa khot ïa ka expression of interest (EOI) bad ong, “kumba ka long mynta, ngin dang ban shim ïa ka rai kumno ban leh ïa kane ka kam.”
Halor ka jingtyrwa ban pynkynriah ïa ki nongdie die madan na Khyndailad, u Bah Sniawbha u la ong, “Ki dang hap ban pynbeit ïa ka tarik. Wat khuslai ngin sa pyndep ïa kane ka kam bad ki kam ki jam ki la ïaid mynta bad yn shim ïa rai halor kane.”