Yn ym don MLA ban phet na ka NPP ong u Dr Kharlukhi

Shillong, Jymmang 20 : U President ka NPP hapoh ka jylla u Dr W.R Kharlukhi u la kren shai ba yn ym don uwei ruh u MLA jongka NPP u ban phet na ka party shwa ka election MLA 2023 bad kumba long mynta ka parti ka la pynkhreh ban ïa aireng tyngeh ha katei ka election ban wan.
“ Yn ym don uwei ruh u MLA ka NPP u ban mih noh na ka party namar lada phai sha ki elekshon shiteng samoi kiba la dep ka NPP ka la jop ha baroh lai tylli ki constituency wat hapdeng ki jingshah kynthoh bad kren pyrshah ba ka ïalam ïa ka sorkar bad kane ka pynpaw ba ki paidbah ki don ka jingshaniah ha ka NPP” ong u Dr Kharlukhi.
U la kren ïa kane kum ka jingpynshai ïa kaei kaba u Nongïalam ka Liang Pyrshah bad jongka AITC u Dr Mukul Sangma u kren ba kin sa don kiba phet na ka NPP ruh shwa ka election. U Dr Kharlukhi ula ai ka jingïaroh ruh ïa u Dr Sangma uba la kren halor ki jingshisha da kaba u pdiang ba kin sa don hi ki MLA ka AITC ki ban mih na ka party shwa ka election MLA 2023.
U Dr Kharlukhi ula kyntait ruh ïa ka jingkynnoh u Dr Mukul Sangma da kaba ong ba ka NPP ka pyrshang ban khwai jubor ïa ki MLA jong kiwei kiwei ki party ban ïakhun ïa ka election MLA 2023. “ Ngim shym kwai ne pynbor ïano ïano ruhban wan ïashoh bad ka NPP hynrei ki wan hi namar ki ïohi ba ka party ka la nang khlaiñ bad ka trei hok na ka bynta ki paidbah na kata ka daw ki ïa wan sha ka party namar kim kwah ban don ha ki party kiba ym don shuh ka lawei”. ong biang u Dr Kharlukhi.
U la pynshai ruh ba kam don kano kano ka jingïapher jingmut hapdeng ki party kiba ïa synrop lang ha kane ka sorkar MDA ha kaba ïadei bad ka MoU pynbeit pud hapdeng ka Meghalaya bad Assam. “ U Myntri Rangbah u la pynshai lut sha ki nongïalam jong ki party shwa ban leit ïasoi ïa ka kaiphod hakhmat u Amit Shah myntri kam pohïing ka ri. Ym dei tang katta la thaw ruh ïa ki Regional Committee ha kaba ki paralok na kiwei kiwei ki party ruh ki ïadon lang. Kine ki ïaleit lang sha khappud ban bishar bad pynkhreh ïa ka kaiphod” ong u Dr Kharlukhi.
U Dr Kharlukhi u la kyntu ïa u Dr Mukul ban ym ïalam bakla ïa ki paidbah shaphang ka kam ïa pynbeit pud. “ Namar ha ka por ba u long u myntri rangbah ka jylla u khlem leh ei ei ban pynbeit ïa u pud u sam bad mynta ba kane ka sorkar ka la ïaid shakhmat ban pyndep ïa kane ka kam ki ïa pyrshah pynban bad ki long kum kito ki suri ba shu jlew. Ki paidbah ki long kiba stad ki tip kaei kaba dei kaei kaba lait ym kum ka AITC kaba shu pyrshang beit ban ïalam bakla ïa ki paidbah” pynkut u Dr Kharlukhi.