Yn wanrah ka sorkar ïa ki rukom treikam ban pynbha ïa ka jingsam bording ha ka jylla

Shillong, Jymmang 13: U Myntri ka tnat Bording ka sorkar jylla u AT Mondal ha ka sngi baar u la ong ba ka sorkar ka la pyrkhat ban wanrah ïa ki rukom treikam na ka bynta ka snem 2035 khnang ban lah ban pynthikna ïa ka jingpynbha ïa ka kam sam bording ha ka jylla.
Haba kren sha ki lad pathai khubor u Mondal u la ong, “Haba ïadei bad ka jinglong jingman jong ka kam bording ha ka jylla, ngi la pynïaid sted ïa ki lad ki lynti wat la ka jingkyntiew ïa ka kam ka dang long kaba rit haba nujor bad kiwei ki jylla. Ngi la pynkhreh mynta ïa ki rukom pyrkhat kam na ka bynta ka snem 2035 ha kaba ngi la poi sha u snem 2035, ka kam sam bording ha ka jylla kan nangkiew.”
U la pyntip ba ka sorkar ka dang ïakren bad ka Ministry of Power bad ong, “Ngi dang pynpaw ïa kine ki kam kiba lah ban ïarap lang da ka ministry. Baroh kine ki kam la nang shim khia bad ngi dang kyntiew ïa ki rukom pyrkhat kam halor ka kam bording, ka jingdon jong ki nongtrei bad baroh ba kynthup ïa ka jingtreikam ban kyntiew ïa ka jingsam bording ha shwa ban poi jong u snem 2035. Ngi dang trei la ka jong ka kam bad ngi dang wad ruh ïa ki jingshaniah na baroh ha kaba ïadei bad kane ka kam.”
Haba kylli, u Myntri u la ong, “Ngi donkam ban kyntiew ïa ki rukom treikam jong ngi. Hadien ba la pyndep ïa ka RDSS, ngin sa lah ban poi sha ka kyrdan kaba bha namar ki kam ki la sdang bad ki dang ïaibteng. Ka kam kaba ar ka long ban pynduna ïa ki jingduhnong jong ngi bad ka RDSS kan don ka jingpyndait ïa ki smart meter ha kaba kane kan pynduna ïa ka jingduhnong bad ban kyntiew ïa ka jinglum khajna jong ngi. Na ka liang ka tnat mynta ka la khmih ruh haba ïadei bad ka jingsam bording bad ka jingring bording. Ngi la shim ïa baroh ki sienjam ban peit ba ngin lah ban poi sha ka kyrdan haba ngi poi ha u snem 2035.”
Shuh shuh u Myntri u la ïathuh ba da ka jingwan ka aïom slap ka jylla kan long kaba dap ha kaba ïadei bad ka jingsam ïa ka bording.
“Hynrei ha shwa ka jingwan jong ka aïom slap ngi la dap ban pynbna ba ngi biang ka jingpynlang ïa ka bording bad ngin ym donkam ban pynlip bording ne load shedding,” u la ong.