Yn wan poi ka met u Principal Secretary ka jylla u Syed Md A Razi ha ka sngi baar, ïathuh u Myntri Rangbah

Shillong, Iaiong 08: Ïa ka met ba dangsah jong u Principal secretary in-charge Public Health Engineering (PHE) bad Public Works Department (PWD) barim, u Syed Md A Razi, uba la shem ba u la khlad ha hotel ha Uzbekistan, ha ka sngi Nyngkong kan wanpoi ha ka sngi baar.
Haba ïathuh ïa kane u Myntri Rangbah ka jylla u Conrad K Sangma u la ong, “La ïathuh ïa nga ba ka kurim jong u, kaba dei ka officer ha ka sorkar pdeng, ka la leit sha Uzbekistan ban wanrah ïa ka met ba dangsah jong u bad ki la dei ban poi ha kane ka janmied bad na ka liang ka ïing ka sem kan sa pyndep ïa ki jingleh niam bad kiwei kiwei ki kam kiba dei ban leh la shai ka sngi.”
La ïathuh ba naduh ka 4 tarik u Ïaïong u Razi u la leit shuti ha Bukhara, Uzbekistan kaba jngai kumba 8 kynta na Tashkent. Hynrei u khlem jubab satia ïa ka jingphone ha kane ka step, na ka liang ki nongtrei ka Bukhara ki la hap ban kyndang ïa ka jingkhang. La ïathuh ba u la khlad na ka daw cardiac arrest hynrei ïa ka daw kaba shisha dang hap ban pynthikna.
Haba ong ba ka jingkhlad noh jong u Razi ka long ka jingduh kaba khraw ïa ka jylla Meghalaya, u Sangma u la ong, “Nga kwah ban ong ba u Razi, uba dei u ophisar na ka railway service u la wan trei sha Meghalaya ha ki saw snem ba la leit bad u la lah ban trei bha ïa ka kam, na ka liang u chief secretary u Bah DP Wahlang u la ai ka jingmut ruh ban pyndon bynta ïa u ha ka Jal Jeevan Mission kum u Mission Director bad ngi la thung ïa u kum u Mission Director bad u la trei bha ïa ka kam.”
U Myntri Rangbah u la ïathuh ruh ba ka sorkar India halor ka jingkyrpad jong u ka la pynjlan ïa ka samoi treikam jong u Razi sha ka shisnem ba un dang lah ban trei ha Meghalaya.
“Nga la kyrpad ïa u Myntri ka railways ban pynjlan ïa ka samoi treikam jong u sa shisnem bad ha u taïew ba la dep ngi la ïohpdiang ïa kane ka jingmynjur ban pynjlan ïa ka samoi treikam jong u ba u dang lah ban sah ha Meghalaya sa shisnem khnang ba ngin lah ban pyndep ïa ki kam ba ïadei bad ka JJM bad ban pynbeit ïa ki jingeh kiba don ha kane ka jingpyntreikam ïa kane ka projek,” u la bynrap.