Shillong, Naiwieng 18: Ka Sorkar Meghalaya, ha ka jingïatreilang bad ka United Nations World Food Programme (UN-WFP), lyngba ka kyrwoh khubor ka la ong ba ki la wad ïa ki lad ki lynti ban pynjanai ïa ka Public Distribution System (PDS) bad ban pynthikna ba ki nongshong shnong ka Jylla kin ïoh lut ïa ki marbam ba ai da ka Sorkar Pdeng ka ban sa long ha kine ki sngi.
Ha kaba ïadei bad kane na ka liang jong u Myntri ka Food & Civil Supply and Consumers Affair ka Jylla u Bah Comingone Ymbon, uba la pynïaid ïa ka jingïalang ha ka sngi nyngkong bad ka Elisabeth Faure, Country Director ka UD-WFP u la ïathuh halor kane ka bynta.
Shuh shuh halor kane u la ong ba ha ka jingïakren ki la pynleit jingmut ha kaba weng ïa ki jingeh kiba la don lypa hapoh ka PDS bad ban ithuh ïa ki lad ki lynti ban wanrah ïa ka jingshai bad ka jingkitkhlieh ha ka jingsam marbam.
La ong ba ki nongïashim bynta ki la ïamir jingmut kumno ban pyndonkam ïa ki kor ki bor kiba thymmai bad ki rukom treikam kiba thymmai ban pynthikna ïa ka jingpynpoi hok ïa ki marbam ba kongsan sha ki nongïoh jingmyntoi.
Ha kaba ïadei bad kane la ong ba ka mat ba kongsan jong ka jingïalang ka long ka jingpynwandur ïa ka lynti treikam ban ïaid ryngkat bad ki jingthmu jong ka Meghalaya ban pynbiang marbam. Ha kane ka jingïalang la pyni ruh ïa ka jingïasam ïa ki rukom treikam kiba bha tam na kiwei pat ki jylla bad ki jingshemphang shaphang ki rukom treikam kiba jop ba la pyntreikam ha ka pyrthei da ka WFP.
Shuh shuh halor kane na ka liang ka Sorkar Meghalaya bad ka UN-WFP ha u snem 2021 ki la ïatreilang ban pynpoi marbar sha palat ar million ngut ki briew da kaba pynkylla ïa ka rukom sam marbam. Ka jingïatreilang kan ïarap ïa ka WFP bad ka sorkar ba kin ïatreilang sha ka thong ba ar ban nym don kiba shah thngan.
