Nongpoh, Jymmang, 29: Ban pynsapriang ne ban ai jinghikai kyrpang sha ki paidbah ka them Ri Bhoi halor kawei na ka aiñ ba la tip kum ka Protection of Children from Sexual Offences, Act 2012, u Deputy Commissioner ka Ri Bhoi, u Abhilash Baranwal u la ong na ka bor synshar District kan sa thaw kyrpang ïa ki prorkam na ka bynta ban pynlong ïa ki prokram ai jinghikai shaphang katei ka aiñ khnang ba ki dup tip kaei katei ka aiñ POCSO.
Haba ïa kren bad u Nongthoh Khubor, u Deputy Commissioner ka Ri Bhoi, u Abhilash Baranwal, u la ong ba ka long shisha kaba dei ba bun ki paidbah kim pat tip satia ïa kane ka aiñ la ka long ha Nongkyndong ne ha ki jaka sor bad ka dei pat ka aiñ kaba khlaiñ ba kino kino kiba pynkheiñ ïa kane ka aiñ kin nym lait na ki kyndon jongka.
“Ka daw ba ka jingkiew kiba pynkheiñ ïa kane ka aiñ ka lah ruh ban dei namar ba bun kim pat tip haduh katno kane ka aiñ kan treikam bad dei tang lada ki la shah pynhap ha ki kyndon jong ka, kin sa sngewthuh ba ka long ka aiñ kaba khlaiñ bha ba la wan rah khnang na ka bynta ban ai jingïada kyrpang ïa ki khyllung ki khynnah” ong u Abhilash Baranwal, Deputy Commissioner ka Ri Bhoi.
U la ïathuh ruh ba kane ka ain ba la wan rah da ka sorkar pdeng bad kaba la tip ruh kum ka Protection of Children from Sexual Offences, Act, 2012, ka dei ka ain ba la saindur thikna ban ai ka jingïada kaba kyrpang ïa ki khynnah kynthei khamtam ban ïada na ka jingshah leh beijot, ka jingthombor, ki kam leh kynshlein ïa ki kynthie ki khynnah kiba hapo ka rta kaba 18 snem bad kino kino kiba don kti ha kitei ki kam thombor kin nym lait na ka jingpynshitom kaba dei katkum kane ka kyndon aiñ.
Na ka bynta ban pynduh ïa ki kam thombor pyrshah ïa ki kynthei ki khynnah, u Abhilash Baranwal u la ong ka ophis jong u, kan sa thaw da ki prokram kiba kyrpang ban ïa trei lang nadu ka tnad Pulit, ka tnad ka koit ka khiah, ka tnad DIRP, ka tnad Social Welfare ban leit ïa kata ka jinghikai sha ki shnong bapher bapher bad ka thong hi ka long ban pynduna ïa ka jingshah thombor ki kynthei ki khynnah bad ruh ban pynsngewthuh ïa ki paidbah halor katei ka aiñ POCSO, u la bynrap.
U la pynkut ruh da kaba ong ba bun ki shynrang ki shah pynshitom ne shah jynjar ei haba ki leh ïa ki kam kiba thombor ïa ki kynthei ki khynnah bad lada ngi lah pat ban pynshai ne ai jinghikai sha man la ki shnong ne shaki paidbah kan long ka jingïarap kaba khraw ba kin tip ba kane ka aiñ kan pynshitom lada ki leh ïa kitei ki kam beaiñ kiba long pyrshah ïa ki kynthei ki khynnah.
