Sngewhun u Myntri Rangbah ïa ki jingïaid ki kam ka Williamnagar Urban Water Supply Scheme

Shillong, Jymmang 28: U Myntri Rangbah ka jylla u Conrad K Sangma ha ryngkat ka jingdonlang u Myntri ka tnat PHE u Marcuise Marak, u Commissioner Secretary, u Chief Engineer ka PHE bad ki ophisar ki la leit ban jurip bad ban bishar kam ha kaba ïadei bad ka jingtei kaba dang ïaid shakhmat jong ka Williamnagar Urban Water Supply Scheme kaba dei jong ka phase 1.
Ha kane ka jingleit jurip u Myntri Rangbah u la ïohi ba ka jingpyntrei ïa kane ka projek ka la ïaid shaphrang bad baroh ki kam jingpyntrei ki la ïaid shaid shaid bad la khmih lynti ba kane ka projek yn lah ban pyndep noh shen.
“Hadien kane ngi la khmih lynti bad da ka jingtrei shitom ngin sa lah ban mang pisa pat sa na ka bynta ka phase 2 khnang ba baroh ka projek yn lah ban pyndep pura khnang ba ki nongshong shnong ka Sor Williamnagar kin ïoh ka um kaba biang bad kaba pahuh pahai,” ong u Myntri Rangbah.
U la ïathuh ba kane jaka pynlang umbam umdih kan lah ban pynmih haduh 15 million litre ha ka shi sngi bad la thmu ruh ban pynïar pat ïa ka hadien jong ka 15 ne 20 snem khnang ban lah ban pyndap ka um ka ban kot sha ka 20 million litre ha ka shi sngi.
“Ngi kyrmen ba kane ka projek kan ïarap ban pynurlong ïa ka jingdonkam ka um hadien 30 haduh 40 snem na ka bynta ka Williamnagar naba kane ka dei ka long term plan bad ngi kmen ban ïohi ïa ki jingïaid shakhmat jong ki kam bad sngewdei ban ai ka jingkhublei ïa u Myntri ka tnat PHE uba dei ruh ha kajuh ka por u MLA kane ka constituency u Marcuise Marak bad baroh ka kynhun jong ka tnat PHE hapoh ka jingïalam jong u CE halor ki kam ba ki la trei bha,” ong u Myntri Rangbah.