Yn tehlakam ka Council ïa ka pom dieng pathar ha ki khlaw ka KHADC, ong ka kong Macdalyn

Shillong Naitung 11: Ka EM ba khmih ïa ka tnat Forest hapoh ka EC ka KHADC ka Kong Macdalyn S. Mawlong ka la ïathuh ba ki nongtrei kiba don ha ki jaka thung dieng ne plantation jong ka Council ki don ha ki 13 tylli ki plantation bad na ka liang ka Council kan tehlakam ïa ka jingpom dieng pathar ha ki khlaw ka KHADC.
Ka la ïathuh ba ha Lailad Plantation ki don 7 ngut ki nongtrei, ha Lumshami Plantation 6 ngut, Umsaw Nongkharai Plantation 4 ngut, Sohlait Plantation 5 ngut, Lumsohpetbneng plantation ki don 13 ngut ki nongtrei.
Katba ha Umtham plantation 8 ngut, Lumsharyntoh plantation 3 ngut, Bynihat plantation 9 ngut Langumshing plantation 2 ngut, Noonmati Plantation 4 ngut, Umling Plantation 4 ngut, Nongshillong Ramshynrai plantation 5 ngut bad ka Aradonga plantation ki don 8 ngut ki nongtrei.
Ïa kane ka EM ka la jubab ïa ka jingkylli ba la wanrah da u MDC ka Liang Ïatei u Bah T W Chyne uba dei ruh napoh ka Sohra Konstituensi bad uba la kylli ruh la ka Langumshing ka dang don ne ki nongtrei bad lane ka Plantation ka dang im ne em, la ka Athiabari mynshwa kaba dei kaba rben bha ka khlaw hynrei mynta lah nanglut, bad ha Lumsohpetbneng ruh dang don ki dieng namar ïoh dei ba hangtei ki tieng ban pom dieng, la ki nongtrei ki don em ha ka jaka, la ka don ne ka jingthung dieng ba manla ka por.
Halor kane ka EM ka la pyntip hapoh ka Ïing Dorbar Lyuir ka KHADC ha kaba ka la ong ba ka Langumshing ka dang don bad ki nongtrei ki leit khmih bad ban pahara, haba ïadei bad ka Lailad ka jingheh ka jaka kaba long khlaw ka long 2,26 hectare, ki nongtrei ki don la ki quarter ki sah ha kine ki jaka, bad kam shym la don ka jingpom dieng pathar.
Katba ha Umtham plantation ka la dep don ka jingthung ïa kumba 150 tylli ki tynrai dieng bad ka tnat ka dang ïai pynneh pynsah haduh mynta. Haba ïadei bad ka jingïoh skhim ban thung dieng ka EM ka la ïathuh ba kam shym don Skhim hynrei la bei pisa da ka JAITA kaba la kyrshan skhim bad la ïoh ban thung ïa ki dieng bad la sam ruh sha paidbah ha ki shnong bapher bapher ba ki don khnang ba kin lah ban pynjyrngam ïa ki khlaw jong ki.