Yn shim Sou Moto Case ka High Court lada ym leh eiei ka Sorkar ïa ka jingjia ha NEHU

Shillong, Naiwieng, 13: Ka Ingbishar Meghalaya High Court ha ka sngi Balang ka la pyntip ba kan sa shim Sou Moto ïa ka jingjia ha skulbah North Eastern Hill University (NEHU) lada ka Sorkar kam pat lah ban pynkut noh ïa ki jingjia hapoh kane ka skulbah.
Ka Ingbishar ka la shong bishar ïa ka PIL kaba kyrpad ban tuklar bad ban pynmih ïa ka hukum khnang ban wanrah biang ïa ka jingïaid beit ïaid ryntih jong ka skulbah, kaba la don mynta hapdeng ka jingkhangdam na ka jingïakhih shah thngan ba la lamkhmat da ka North Eastern Hill University Students’ Union (NEHUSU) bad ba la kyrshan da ka Khasi Students’ Union (KSU – NEHU Unit) mynta la khyndai sngi kynthih, halor ka jingdawa ban weng ïa u Vice Chancellor u Prof PS Shukla, u Registrar u Omkar Sing bad u Deputy Registrar u Amit Gupta.
Ka Division Bench ba la khlieh da u Chief Justice u IP Mukerji bad u Judge u B. Bhattacharjee ha ka hukum ba la pynmih, ka la ong, “ïa ka skulbah NEHU la pynïaid da ka Sorkar Pdeng, la aipor ban ïa pynbeit noh mardor ïa ki jingeh bad lada ym lah ban pynbeit ïa ki jingeh katkum ka por ba la buh, ka Ingbishar kan sa shim Sou Moto dalade bad ban pynmih ruh ïa ka rai halor kane.”
Ka Ingbishar ka la pyntip ruh ba kan nang ïai peitngor ïa ki jinglong jingman kiba nang ïai jia manla ka sngi hapoh ka skulbah bad ka la buh por ruh ban shong bishar ïa kane ka kam ha ka 20 tarik Naiwieng, 2024.
Ka Division Bench ka la bthah ïa u nongujor ban phah ïa kane ka hukum sha baroh ki kynhun kynthup ïa ka Sorkar Pdeng bad Sorkar Jylla, ïa u Vice Chancellor, bad ïa ki nongtrei bad ki samla pule.