Nongpoh, K’lyngkot, 10: Ka kynhun jong ki nongthied ïa ki mar rep ba la pynmih da ki nongrep ha ka thaiñ Bhoirymbong ha Ri Bhoi District lyngba ka Fresh Green Ginger Association, Bhoirymbong, ki la pyntip paidbah sha baroh ki nongrep ba ha ka 13 tarik u Kyllalyngkot 2025 kan nym don ka jingthied ïa ki mar rep ha katei ka ïew kaba don ha ka Bhoirymbong.
Kumba la pyntip da u President ka Fresh Green Ginger Association, u Bah Shanbor Rympei, la ong ba ka daw ka jinghap ban sangeh thied ïa ki mar rep bad khamtam u syieng ba pynmih ki nongrep na katei ka thaiñ, ka dei na ka daw ka jingdon ka jingïakynduh ba shisien shisnem jong ki nongthied nongpet ïa ki mar rep na katei ka ïew.
U Bah Shanbor Rympei u la kyrpad ruh ïa baroh ki nongrep kiba wan die ïa ki mar rep ba kin ïai shah tang shi sngi ha katei ka sngi, kaba yn nym don ka jingthied ïa ki mar rep hapoh katei ka ïew Bhoirymbong.
U la shim ruh ka kabu ban ai khublei snem thymmai basuk ba kmen ïa baroh ki paidbah katei ka thaiñ bad khamtam ïa ki nongrep, ba une u snem 2025 un long u snem u ba suk ba kmen bad ruh ba un long u snem jong ka jingkyrkhu ïa baroh khamtam ïa ki nongrep katei ka thaiñ, kiba la ju ïa trei lang bad kane ka Association, u la bynrap.
