Yn sa thung pyndap noh ka tnat ka Koit ka Khiah ïa ki kam Pharmacist ba lait ha ki bnai ban wan

Shillong, ïaïong 29: Ka Meghalaya Pharmacists Association (MPA) ka la ïathuh ba ka tnat ka koit ka khiah ka la pynthikna ba kan sa thung pyndap noh ïa ki kam Pharmacist ba lait ha ki bnai ban wan ha kane ka jylla.
Ha kaba ïadei bad kane haba ïakren sha ki lad pathai khubor, u President ka MPA samla Englebert Rynjah u la pyntip ba ka Association ka la ïakynduh ïa ka Myntri ka tnat ka Koit ka Khiah ka Kong Ampareen Lyngdoh bad la kyntu ban shim ïa ki sienjam ki ban weng ïa ki jingeh jong ki Pharmacist kiba la mad hapoh ka Jylla Meghalaya.
Shuh shuh ha kaba ïadei bad ka jingduna ki lad ïoh kam, u Bah Englebert u la ong ba katkum ka RTI haduh kine ki sngi kam pat don kano kano ka jingthungkam Pharmacist lyngba ka jingpynbna paidbah lane Advertisement kaba la shim da ka Sorkar na ka bynta ki kam ba la mang ne ki Sanctioned Post kum ki pharmacist hapoh ka Directorate of Health Services.
U la ong, “Namar kata ngi la kyrpad ïa ka tnat ban sdang ïa ka jingpynrung kam kaba hok bad kaba kynthup lang ïa baroh ki Sponsored bad Non-Sponsored Pharmacist ki ban ïakhun na ka bynta ki kam ba lait. Ha ka jingïalang ka Myntri kala kular ba ka tnat ka koit ka khiah kan sa pynbna paidbah lyngba ka Advertisement haba ïadei bad ka jinglait kam Pharmacist.”
Halor ka jingkyrpad ban pynbun Pharmacist katkum ki kyndon jong ka IPH ha baroh ki jaka sumar, kum ka District Hospital, CHCS, PHC, bad Sub-Centre, u samla Englebert u la ong ba ba ka tnat ka koit ka khiah kan wanrah ka jingpynkylla ïa ka Service Rules katkum ka jingdonkam ban weng ïa ki jingeh halor kane ka bynta.
Shuh shuh halor ka jingdawa ban thung bun ngut ki Drug Inspector (DI) ha ka Jylla, u president ka MPA u la ong ba ka tnat ka la pynthikna ruh ban pynmih ïa ki jingpynbna na ka bynta ban pyndap ïa ki kam kiba lait.
Nalor kane ka MPA ka dawa ruh na ka Sorkar ba ka dei ban pynbun ïa ki lad ïoh kam ïoh jam ïa ki samla kiba la pyndep ïa ka jingpule pharmacy da kaba thaw da ka Pharmaceutical Industries hapoh ka Jylla ha kaba ka tnat ka koit ka khiah ka la kular ban eksamin ïa kane.
Ka MPA ka la kyntu ruh ban don da ka jingjied lane ilekshon kaba khuid bad ba suba jong ka Meghalaya Pharmacy Council khnang ban jied ïa ki riew shemphang kiba tbit ban mihkhmat ïa ka imlang sahlang.
Na ka liang u President ka MPA u la ong, “Da kaba pynshong nongrim ha ka jingtip jong ngi, ka ilekshon kaba khatduh na ka bynta ka Meghalaya Pharmacy Council ka la long ha u snem 1996, bad ym shym la don kano kano ka ilekshon naduh kata ka por. Ngi kyrpad ban pynim biang mardor ïa ka Council bad ban sdang noh da ki ilekshon ba thymmai katkum ka aiñ Pharmacy Act, 1948, khnang ba ïa ki mat kiba kongsan yn lah ban pynbeit da ka Sorkar Jylla.”