Yn pyrkhing ïa ka ïaid kali ha kylleng ka Polo ha ka sngi plie pyrda ïa ka Durand Cup ha Shillong

Shillong, Naitung 30: Katba ka jingpynkhreh jong ka nongbah Shillong ban pdiang bad pynlong ïa ki jingïalehkai ka Durand Cup (Group-F) ha ka sien ba nyngkong ka la nangjan, na ka liang jong ka tnat pulit hynne ka Sngi Balang ka la pyntip ba yn pyrkhing bha ïa ka ïaid ka ïeng kali ha sawdong ka madan phutbol – JN Sports Complex ha Polo ha ka Sngi Thohdieng.
La khmihlynti ba ha katei ka sngi, ka JN Stadium kan dap da ki riew pawkhmat jong ka sorkar jylla, ka tnat shipai armed force, khlem da jer kyrteng ïa ki ar tylli ki kynhun ban ïalehkai, ki nongpeitkai, bad kiwei kiwei, ha ka sngi plie pyrda ïa ka jingïalehkai kaba nyngkong ha nongbah.
Ka jingïalehkai kan long hapdeng ka Shillong Lajong FC pyrshah ïa ka kynhun Tribhuvan Army FC kaba na Nepal kaba la pynbeit ban sdang ha ka por 4 baje nohphaisngi, ha kaba ka jingplie pyrda yn sdang naduh ka por 2 baje mynsngi. Ka jingplie ïa kane ka lympung ha kiwei pat ki jaka la sakhi ïa ka jingpynbyrñia da ka jingïaid kynhun, ki nongshad lem bad kiwei de kiba la don bynta ban pynshongshit ha ka sngi plie ïa kane ka lympung.
Yn pyrkhing ïa ka leit ka wan naduh ka por 1 baje ha katei ka sngi tad haduh da kut ka prokram. Yn nym shah rung ïa ki kali ba wan Lumjingshai kiba thmu ïaid sha Central Reserve Police Force bad yn nym shah rung na Lumjingshai ban leit sha Forest Colony.
La kyrpad ruh ïa ki paidbah ba kim dei ban pynïeng ïa ki kali jong ki ha ki thaiñ Polo naduh ka por 11 baje mynsngi ha katei ka sngi tad haduh ban da kut ka jingïalang. Kaba kham kongsan, yn nym shah ïa ki kali ban pynïeng ha ki rud surok ha ki thaiñ Golf Links haduh CRPF.