Nongpoh, Lber 26: Ban pynneh pynsah ïa ki riti ki dustur bad ïa ki jinglong kyrpang kiba don hapoh ka Raid, ka Raid Nongpoh ba hap ha ka Nongpoh Sirdarship mynta u snem sa shien ka la pynkhreh pynkhrum ïa ka ïingsad, u Diengsad ka Raid da ka jingangnud ban pynlong ïa ka Tamasa Shad Sajer ka Raid kumba la pynbna mynta ka sngi ba katei ka Tamasa Shad Sajer yn pynlong ha u Lum Wyrtoh, kaba dei ka jaka kyntang ka Raid Nongpoh.
Haba kren sha ki lad pathai khubor mynta ka sngi, u Bah Linus Lyngdoh, u Lyngdoh ka Raid Nongpoh u la pyntip paidbah kane ka tamasa Shad Sajer kan long ha ka 29 tarik u Lber 2025 ha u Lum Wyrtoh, ba ka jingthmu kane ka lympung ka long ban pynneh pynsah ïa ki riti ki dustur kumba la ïalam naduh ki mynbarim bajah.
U la ong ruh ka Raid ka don ruh ïa ka thong ban pynneh pynsah ïa baroh ki jinglong kyrpang naduh ki riti ki dustur, ka kolshor bad kiwei kiwei kiba long tynrai ban pyni sha ka pyrthei ba ka Raid Nongpoh ruh ka dei ka Raid kaba riewpshah halor ka riti ka dustur, ki riam bad shad tynrai.
U Lyngdoh ka Raid, u Bah Linus Lyngdoh, u la ïathuh ruh ba ha katei ka sngi kin don ki jingtem, ki jingput bad ki jingshad tynrai ban shim bynta na kiwei ruh ki Raid ba marjan bad kin don ruh kiwei ki jingïalehkai ba kynthup kum ka jingïatan tyllai, ka jingïakop kiew siej bad ki dukan bam kiba la pynkhreh pynkhrum da ki mar bam tyrnai.
Ha katei ka sngi, yn wan shim bynta ruh u Symbut Myntri rangbah ka jylla, u Bah Prestone Tynsong kum u kongsa bad u MLA ka Nongpoh, u Bah Mayral Born Syiem kum u kongsan, nalor kiwei kiwei ki kynrem ki lyndan, u la ong.
Shuh shuh, u la pyntip ruh ba ka Dorbar Raid Nongpoh ka la pynkhreh ba kin don ki kali ki motor ki ban kit ïaki paidbah ki bym don kali ban ïa wan sha katei ka jaka. Ha kawei ka bynta ka Raid ka khot ka wer ïa ki khun ki hajar na ka Raid bad na kiwei ruh ki raid ba marjan ban ïa poi ha katei ka sngi, khnang ba ka jingpynlong ïa kane ka tamasa shad sajer kan long kaba jop bad kaba phuh ba phieng, u la bynrap.
