Jowai, K’Lyngkot 30: Kawei na ki kynhun treimon sngewbha kaba peit bad ïada ïaka jinglong kyrpang jong ka Wah Myntdu, ïa kaba la tip kum ka “Khooid Ya Ka Wah Myntdu” kala pyntip ba kan pynlong ïaka Dorbar Paidbah haka 03/02/2024 naduh ka por 12 baje shiteng mynsngi ha Yungwalieh Chilliang Raij Dorbar Shnong, Jowai.
Ha kane ka Dorbar Paidbah ka “Khooid Ya Ka Wah Myntdu” kan pynthymmai kumjuh ïa nongkitkam jong ka naka bynta u snem 2024-2025.
Haba phai sha ki kam jong kane ka kynhun ka long shi bynta ban khang pyrshah ïa ka rukom bret ïa ki ñiut sha ki bynta ka wah Myntdu bad ban khang lad na ki jingshah pynulor ki bynta ka wah ha ki briew kiba ju mlien ban tih maw, khar shyiap, kiba sait jaiñ bad kiba sait kali, kane ka kynhun kan ïaleh ruh kumno ban pynjyrngam ïa ki rud jong ka wah bad ban pynneh pynsah ïa ki dohum dohwah.
Shuh shuh kane ka kynhun kala ïatreilang naduh ki bor sorkar, ki Dorbar shnong bad ki paidbah nongshnong shnong ban wanrah ïa ka khuid ka suba jong ka Wah Myntdu, khnang ba ka umbam umdih kaba poi sha manla ki thliew ïing kan long kaba khuid ba suba. Kum ka kynhun kala dep ban trei shibun ki kam bad ki dang don ruh kiba kan sa pyndep.
Ha kaba ïadei bad kane ka Dorbar Paidbah na ka liang ka kynhun ka khot sngewbha ïa baroh ki nongshong shnong shynrang bad kynthei na ki Dorbar Shnong bapher bapher hapoh ka sor Jowai bad kumjuh ïa ki shnong ba marjan kiba don sawdong ka Wah Myntdu ba kin ïa wan khnang sha kane ka jingïalang.
