Nongstoiñ, Ïaïong, 7: Ka Nongjyllieh Youth Sport Social & Development Organisation ka kynhun jong ki samla jong ka shnong Nongjyllieh, West Khasi HIlls District kum shibynta ka jingrakhe ïa ka jingïaid lynti ïa ki arphewsan tylli ki mawmere jong ka Organisation, ka la pynlong ïa ka tamasa phutbol ha ka madan jong ka kaba don hapdeng jong katei ka shnong.
Ha kane ka lympung ïalehkai ki don kumba 16 tylli ki kynhun ïalehkai na ki Klob bapher bapher kiba la wan ban ïashim bynta.
Napdeng ki 16 tylli ki kynhun ïalehkai, ki kynhun kiba la ïakhun ha ka Semi final ki long ka Ïatyllilang FC kaba la ïakhun pyrshah ïa ka Mawrangtongweiñ, ha kaba ka Ïatyllilang FC ka la pynliem ïa Mawrang-tongweiñ da 4 la 1 kol.
Ha ka kynhun kaba ar pat, ki kynhun kiba la ïakhun ki long ka Lawse SC pyrshah ïa ka Youngster FC ha kaba ka Youngster FC ka la pynliem ïa ka Lawse FC da 2 la 1 kol.
U bah Chandra Nongdkhar uba long u Secretary jong ka Organisation haba pyntip ha u nongthoh khubor, u la ong ba ïa ka jingïakhun phainal yn sa pynlong ha ka 10 tarik mynta u bnai ha ka por 2:00 baje nohphai sngi ha katei ka juh ka madan.
Ha kane ka jingïakhun phainal ka kynhun kaba jop kan ïoh ban rah ïa ka khusnam kaba arphew hajar tyngka lem bad ka trophy katba ka kynhun kaba wan baar kan ïoh khur ïa ka khusnam da a song pisa kaba shiphew hajar tyngka.
Nalorkata kan don ruh ka jingai khusnam ïa u Best Player, Best Goalkeeper bad u Top Scorer.
U la kyntu ruh ïa baroh ki paitbah kiba ieit ban peit kai phutbol ba kin ïawan ban pynshngaiñ ha katei ka sngi bad ban pynshongshit ïa ka jingïalehkai kum ka jingai mynsiem ïa ka jingrakhe Jubili jong ka seng.
