Shillong, Nailur 14 : Ka National People’s Party (NPP), Mylliem Constituency, ka pynbna paidbah ba kan pynlong biang ïa ka jingai khusnam ne ka 8th U Tirot Sing Academic Award 2026, kum ka dak jong ka jingsngewburom bad jingithuh ïa ka jingtreishitom bad ka jingjop jong ki khynnah pule na ka Mylliem Constituency.
Kane ka Academic Award ka long kyrpang na ka bynta ki samla kiba pass bha ha ka HSLC, SSLC, ICSE bad CBSE Examination 2026, bad kynthup ruh ïa kiba la pyndep ïa ka Doctor of Philosophy (PhD) ha ka snem pule 2025-2026
Katkum ka jingpynbna, ki nongïoh bynta na ka ICSE bad CBSE ki dei ban ïoh 75% shaneng, katba kiba na ka SSLC bad HSLC ki dei ban ïoh 70% shaneng.
Ka NPP Mylliem Constituency kan ai ruh ïa ka laptop sha ki khynnah kiba wan ha ka Top 20 ha ka SSLC, kum ka jingpynshlur ïa ki ban dang trei shitom ha ka pule puthi bad ban kyntiew ïa ka sap, ka jingnang bad ka jingstad jong ki.
Ki samla pule kiba kwah ban ïoh bynta ki dei ban pynpoi ïa ka marksheet bad ka EPIC jong ki kmie/kpa sha ka Office jong Bah Hamlet Dohling ha Lummawbah, naduh ka por 9:00 baje mynstep haduh 1:00 baje janmiet.Ka tarik ba khatduh ban pynpoi ïa ki kot ki sla ka long ha ka 05 tarik Risaw, 2026.
Na ka liang ka NPP Mylliem Constituency, la kyntu ïa baroh ki khynnah pule kiba hap hapoh ki kyndon ba la buh ban pynrung kyrteng bad ban shim bynta ha kane ka Academic Award, kaba long kum ka jingithuh ïa ka jingtreishitom bad ka jinglah jong ki samla jong ka thaiñ.
Na bynta ki jingtip ba kham bniah, phi lah ban ïakren bad ki nongkitkam jong ka NPP Mylliem Constituency ha kine ki number – Bah Ricky Kupar Pathaw : 7005880080 bad Bah Bah Wonder Dkhar : 8787744075
