Yn pyndonkam noh da ki kot NCERT ha ki skul ka jylla ong u Myntri
![](https://mawphor.com/wp-content/uploads/2023/07/NCERT-Logo.jpeg)
Shillong, Naitung 10 : Ka Sorkar Jylla ka la rai ba shen kan sa pyndonkam noh da ki kot ka National Council of Educational Research and Training (NCERT) ha ki skul hapoh ka Jylla.
Haba pyntip ïa kane mynta ka Lah Sngi U Blei, u Myntri ka Pule puthi u Rakkam A Sangma ula ïathuh ba ula dep ïakynduh dang shen ïa u Chairperson ka Central Board of School Education (CBSE) ha New Delhi.
Ha kane ka jingïalang la ïadonlang ruh u nongaibuit ka Tnad Pule Puthi ka Jylla u Bah Himalaya Shangpliang lem bad ki Ophisar na ka DERT.
U pyntip ba ka Jylla ka la kyrpad ïa ka CBSE ba kan ïarap ïa ka Tnad Pule Puthi ba kan pyndonkam noh da ki kot ka NCERT ha ki skul kiba don hapoh ka Jylla.
“Ki bor pynïaid ka CBSE ki la kular ba kin sa ai ïa ki jinghikai ïa ki nonghikai jong ngi. Ngin sa phah ïa ki katto katne ngut ki nonghikai na ka Jylla sha Delhi ba kin leit hikai pyntbit bad kin sa wan ruh sha Jylla ban ai jinghikai bad ban ïarap ïa ka tnad Pule Puthi halor kane ka kam” ula ong.
ïa kane ka rai la shim ruh hadien ba bun na ki jingkylli jong ka eksam CUET ka dei kaba la set na ki kot ka NCERT.
U Myntri ula pyntip ba ïa ka kam ba ïadei bad ka CUET ruh la ïakren bad u Myntri ka Ministry of Human Resource Development bad ïathuh ba ka National Testing Authority (NTA) kan sa buh ïa ki CUET centre ha Shillong, Tura bad Jowai shuwa ka eksamin jong u snem ban sa wan.
“Kiba bun ki samla jong ngi ki la ngat ha ki centre shabar ka Jylla mynta u snem. Hadien ka jingtuklar jong u Myntri Rangbah ka Jylla, kiba bun ki bym ïoh leit ïaleh ïa ka eksam kin sa ïohlad ban ïaleh biang” ula ong.