Tura, Nailar, 20: Ka Garo Student Union (GSU) seng kmie ka la rai ban pynlong da ka jingpakhang ophis ha baroh ki ophis treikam ka MeECL ha ri lum Garo ha ka por mynsngi bad hadien kane kan khot da ka pakhang surok pat ha ka por mynmiet namar ka jingbym shim khia jong ki bor ba halor kane ka tnad pynmih bording ïa ki mat jingdawa jongka seng.
ïa kane ka jingpakhang ophis bad pakhang surok ka GSU ka la pyntip sha baroh ki DC bad SP jong ki District ha ri lum Garo. Ka jingpakhang ophis kan sdang ha ka 24,25,26 tarik Nailar 2022 bad kan bteng pat da ka pakhang surok miet naduh ka 29 tarik Nailar haduh 3 tarik Nailur 2022 naduh ka por 9 baje mynmiet haduh 5 baje mynstep.
Ka GSU ka dawa ba dei ban thung briew shuh shuh ka MeECL khnang ba kan lah ban ai ka jingshakri ïa ki paid ka ri lum Garo namar kumba ka long mynta ki bun sa tang ki jingduna bad ka la buh ïa ki paidbah ha ka jingeh kaba khraw. Hynrei halor kane ki bor ba dei peit jongka MeECL ki khlem ai jubab wat tang shi kyntien ruh ne khot ïa ki nongïalam ka seng sha ka jingïakren.
Ka jigndawa jong ka GSU ka long ba ki bor ba halor ka MeECL ki dei ban thung briew shuh shuh khnang ba kane ka tnad kan lah ban pynbiang bor ding ha ri lum Garo. Nalor kane ban pynsangeh shisyndon ïa ka jingsam bording ba noh shilliang khamtam eh ha kaba pynkynriah kam ïa ki nongtrei jongka.
K GSU ka la pynpaw ba ki don bun ki nongtrei ha ki kyrdan Class III bad IV la pynkynriah noh na Garo Hills sha Khasi Hills katba ym shym la wanrah wat tang uwei u Khasi ruh sha ri lum Garo. Wat lada don ruh tang shisnem kila ïoh ban kynriah biang sha Khasi Hills. Ki la pynpaw ba ha u snem 2020-21 ki la don bun ki jingthung kam ha Khasi Hills hynrei tang iwei i Garo ruh ym shym la ïoh rung. Nalor kata ym lap ban don wat tang iwei ruh i nongtrei Garo ha ophis jongka MeECL ha Lum Jingshai.
Na ka por sha ka por la ai jingthoh bad la wad ruh da ka RTI halor kane ka jingleh shilliang khmat hynrei ym don satia ba patiaw ne shim khia ïa ki jingeh ba ki paidbah ki ïakynduh na ka por sha ka por ha kaba ïadei bad ka jingthut ka ding elektrik sha Garo Hills.
Na kata ka daw ka GSU kam banse ban pynlong da ki jingïakhih .Kane ka long kat kum ka kyrwoh na u General Secretary ka GSU u Bibian G Momin.
