Shillong, Naiwieng 28 : U Myntri Rangbah ka Jylla, Conrad K Sangma ha ka sngi Nyngkong u la wer ïa baroh ba kin ai ka jingïatrei lang ban pyntikna ba ka suk ka saiñ kan wanphai biang ha ka jylla bad ruh ban pynkut syndon ïa ka jingshong syier khamtam ha nongbah Shillong.
Haba kren bad ki lad pathai khubor hadien ka jingïalang bad ki nongïalam jong ki seng saiñpyrthei bapher bapher, u Myntri Rangbah u la pynpaw ruh ïa ka jingsngewsih ban ïohi ba ki don ki jingjïa ki bym sngewtynnad ha ka sngi ba don ka jingïakhih ba jar jai ha kine ki khyndiat sngi ba ladep.
“Nga la dep pyntip ha ki nongïalam jong ki political party bapher bapher ba kum kine ki jingthombor ha kaba ki don kiba pyrshang wat ban rung ha Civil Hospital bad pyrshang ban pynjulor,” u la ong da kaba bynrap ruh ba kito kiba donkti ha katei ka kam kin sa ngat ha ka jingshah pynshitom katkum ki kyndon jong ka aiñ halor ka jingleit jong ki ban thombor ha ki jaka sumar.
U ong ruh ba la bthah ruh ïa ki pulit ban thwet ïa kito ki briew kiba donkti ha katei ka kam.
