Shillong, Naiwieng 28 : Hadien ba ka sorkar ka la khot ïakren bad ïa syllok mynta ka sngi ïa ki Seng Saiñ Pyrthei bapher bapher halor ka jingshah siat iap ki hynriew ngut ki mynsiem briew ha ki pulit Assam ha Mukroh, West Jaintia Hills ha ka 22.11.2022, na ka liang u MLA jongka Mawlai Constituency u bah Process T Sawkmie u la ong ba ka sorkar ka la dei ban khot ïakren lang wat ïaki seng bhalang bad ki Rangbah Shnong ruh khnang ban ïatrei lang ban wanrah ïa ka shongsuk shongsaiñ kaba pura.
Haba ïakren bad u nongthoh khubor u bah P.T Sawkmie u la ong “ Kane ka dei ka aiom ba ki kmie ki kpa ki hap ban siew bai skul ïa ki khun shwa ban ïoh ïaki result, nalor kata ka dei ka aiom ban pynkhreh ïa ka jingleh kmen Khristmas bad Snem Thymmai kumta lada ki nongbylla sngi ne khamtam kito ki nongbylla kyndoi jakpoh kim ïoh ban leit trei leit ktah tang na ka daw bym don ka shongsuk shongsaiñ, katno kan ktah jur ïa ki bad kumno kin leh ban ïoh pisa ban siew dep ïa ka baiskul ki khun ki kti”.
Kumta kumba ki Seng Bhalang bad ki Rangbah Shnong ki dei kiba don ha madan bad sngewthuh bha ïa ka jinglong jingman ka suk ka saiñ ka sorkar kam dei ban leh klet hynrei ka dei ban khot ïakren beit ïa ki halor kane ka kam. Namar ki kynrum kynram kiba la mih ha kane ka nongbah bad sha kiwei kiwei ki jaka ruh dei namar ba ki seng bhalang ki sngewpyrshah jur halor katei ka jingjia bad khamtam ki sngew pyrshah sorkar namar dei ka jingbym shim khia ka sorkar ban buh ïa ki Out Post ha khappud kumba la ïakren ruh na ka por sha ka por hapoh ïing dorbar ba sa jia kine ki jingjia ba sngewsih ym tang mynta ka kynti hynrei na ka por sha ka por.
U la ong ban ïakren tang bad ki seng saiñ pyrthei kam don jingmyntoi namar mynta lei lei ba la jan ka election MLA kin pynkylla politik ïa kane ka kam kumta kiba sngewthuh hi ki dei ki seng bhalang bad ki rangbah shnong kumta u la banjur biang ïa ka sorkar ba ka dei ban khot ïakren beit ïaki seng bhalang bad ïa ki rangbah shnong ban ïatrei lang bad ïasngewthuh jingmut halor kane ka mat ba sahteng la slem bah jongka jylla.
