Shillong, Ïaiong 25 : U Myntri Rangbah ka Jylla, Conrad K Sangma u la ong ba shen un sa lum ïa ka jingïalang jong ka Committee ban bishar bniah halor ka jingdawa ban don ïa ka Winter Capital ha Tura.
“Halor ka jingdawa ban don ïa ka Winter Capital ha Tura, ka sorkar jylla kala dep thung ïa ka committee kaba khlieh da u Myntri Rangbah bad shen ka committee kan sa kynduh,” pyntip u Myntri ka tnad PHE Marcuise N Marak haba kren bad ki lad pathai khubor ha ka sngi Palei.
Katkum ka jingpynbna ba pynmih da ka sorkar, ka kamram jong kane ka komiti ka long ban bishar bniah la ka ïahap neem ban don ïa ka Winter Capital ha Tura bad ruh ban bishar bniah ïa ka jingïohnong bad ka jingduhnong lada don ar tylli ki nongbah jong ka Jylla kumba la dawa da ki seng bad ki kynhun bapher bapher.
Nangta la ong ruh ba kine ki komiti kin sa pan jingmut na ki paidbah halor katei ka sienjam bad ban phah pat ïa ka kaiphod sha ka sorkar jylla.
