Yn leit ïakynduh ki nongïalam ka Synjuk Shiphew Shnong ïa u CE PWD

Nongstoiñ, Naitung 26: Kumba katto katne ngut ki nongïalam ka Synjuk ki sordar jong ki shiphew tylli ki shnong kiba don harud ka surok Mawthungmarwei sha Mawlangsu, kaba jngai kumba khatwei kilomitar ba kynthup ïa ka Ramsningwar, Phodumbah, Ranabbah Domkohmen, Phodumbah Sepngi, Mawkohïew bad kiwei kin sa leit ban ïakynduh ïa u Chief Engineer ka tnad PWD ha ka ophis trei kam jong u ha Shillong halor ka surok.
U bah Kharlesborn Nongbri president ka Synjuk u la ong ba ki nongïalam ka synjuk, ki la leit ban ïakynduh ïa u Sub Divisional Officer ka PWD Western circle ha Nongstoiñ. ban pan jingshai halor ka Detail Project Report kaba ka synjuk ka la dep ïoh kopi. Katei ka detail project report ka pyni ba katkum ka sorbe ba ka ophis ka la dep leh, ka jinglut jingsep ha kaba pynbha bad siang rong ïa katei ka surok kaba khawei kilomitar kan kot sha ka 21 klur tyngka tam.
Ka jingleit ïakynduh jong ki ïa u SDO ka PWD Western circle, ka long ban pan jingshai la ka sorkar ka la phah ne em ïa ka mang pisa bad ka la khot tender ne em na ka bynta ban pyntrei ïa katei ka surok. Namar katkum ka jingkular jong u bah Prestone Tynsong Symbud Myntri rangbah ha ka jingleit ïakynduh jong ki nongïalam ka synjuk ha ka 19 tarik jong u bnai jylliew, ba la dep u Symbud Myntri Rangbah u la kular ba ka sorkar kan mang pisa noh kham kloi bad ynda ka la dep mang pisa kan sa wah noh ïa ka tender.
U bah Nongbri u la ong ruh ba kaba lyngngoh ka long ba ha ka jingleit ïakynduh jong ki u SDO, u la jubab pynban da kumwei da kaba ong ba ïa ka jingpynbha ban siang rong ïa katei ka surok, la pynrung noh ha ka skhim Pradhan Mantri Gramsadak Yojana (PMGSY) na Mawlangsu haduh Phodumbah, kaba jngai tang kumba san kilomitar.
Katei ka jingjubab jong u SDO ka la pynsat sia ïa ki nongïalam ka Synjuk, namar ba katei ka jubab ka long pynban mar khongpong bad ka Detail Project Report ba la dep shna. Nalor kata u la ong ruh ba lada siang rong tang san kilomitar kata ruh na Mawlangsu sha Phodumbah, katba na Phodumbah sha Mawthungmarwei ka jingjngai ka dang don kumba hynriew kilomitar tam bad ki paitbah lada ki leit don kam sha Rambrai kum kaba leit phah sumar ïa kiba pang ba shitom ha PHC.
Nangta kiba leit donkam ha Rural Bank, kiba leit donkam sha Block Rambrai ki dang hap ban leit kiew sha Mawlangsu sha Umsaw, Tyllang, Nongstoiñ shaduh Rambrai ha kaba ka jingjngai na Phodumbah tang haduh Nongstoiñ ka long arphew saw kilomitar bad na Nongstoiñ sha Rambrai arphew kilomitar bad lada kheiñ lang kan kot haduh sawphewsaw kilomitar te hato kham jngai ka hynriew kilomitar ne ka sawphew saw kilometer.
U la ong ruh ba ka jingkam jong u SDO ka PWD ba la pynrung ha ka skhim PMGSY, ka dei tang ka jingpynthame. Hynrei lada kiba kum kine ki jingpynthame ki jia ka synjuk kan sa shim da ka sien jam ba tyngeh ban dawa ïa ka hok jong ki paitbah.
U la ong ruh ba kito ki ba shim kabu kim dei ban kheiñ dew thala ïa ka mon u paitbah, namar ka RTI ka dei ka waitlam bad ynda ki paitbah ki la bitar dei hangta ba ka pyrthei kan sa pluh. Dei halor katei ka nongrim ba ki nongïalam ka Synjuk ki la hap ban her kyrkieh ban leit ïakynduh ïa u Chief Engineer.
U bah Nongbri u la ong ruh ba namar ka jingpynshat shrieh jong utei u ophisar ka PWD ha ka sngi ba kin leit sha u CE kin leit ruh ban ïakynduh ïa u Chief Secretary ka jylla. Hadien kata kin sa leit ban tied jingkhang biang sha u Symbud Myntri Rangbah, namar ki la sngewthuh shai kdar bad ki la ïoh jingtip ruh ba ki don ki briew kiba kwah ban rah noh shawei na ka bynta ka jing myntoi jong ki ha ka kam saiñ pyrthei.
Kum ban pynkynmaw ba dang ha ka 19 tarik mynta u bnai ki nongïalam ka synjuk, ki la lum ïa ka jingïalang paitbah ha Phodumbah Upper Primary skul ban ïatai sani bad ïaphylliew jingmut ha kaba ïadei bad ka jingbym shimkhia jong ka sorkar, ban pynbha bad siang rong ïa katei ka surok na Mawthung Marwei sha duh Mawlangsu, ka surok kaba la shna naduh u snem 1994, kaba ki sengbhalang da ki phew sien ki la dawa na ka sorkar ba kan pynbha noh ha ryngkat ki memorandum ba ki la submit sha ki nongmihkhmat bad ka sorkar hynrei haduh mynta kam shym la urlong satia.