Shillong, Nailur 04 : Ka Sorkar Jylla kala rai ban kyrpad ïa ka Sorkar Pdeng ba kan mang pisa kham bun sha ki project ban pynroi ïa ka ïoh ka kot jong ki briew kiba sah ha shilynter u pud u sam bad ka Ri Bangladesh.
Kat kum ka jingong u Myntri Rangbah ka Jylla Conrad K Sangma, “Kam dei satang tang ka kam ban shu khang ïa ki khappud, hap pyrkhat ruh ïa ka jingpynkhlaiñ ïa ka kamai ka kajih ha ki jaka khappud, ki jingtei bad ki jingdonkam baroh na ka bynta ki briew kiba sah ha ki jaka khappud”.
U Myntri Rangbah u pyntip ba un sa leit ïakynduh ïa u Myntri kam Pohïing ka Ri Amit Shah ha New Delhi, ha ka 9 tarik Nailur, ban kyrpad ba un tuklar hi shimet ïa kane ka kam.
“Ngan sa leit sha Delhi na ka bynta ka jingïalang jong ka GST Council ha ka 9 tarik Nailur. Ha kane ka jingleit jong nga, ngan sa ïakynduh biang ïa u Myntri kam Pohïing bad ngan ban jur halor ka jingdonkam ban mang pisa biang bad ai kham bun ki project na ka bynta ban pynroi ha ki jaka khappud. Ngi dang shu dep pynkhreh ïa ka dorkhas mynta ka sngi bad ngin sa ïaid ha kane kajuh ka lynti” ula ong.
U Conrad ula pyntip ba ula ban jur halor ka jingdonkam ban khang ïa ki khappud ha ka jingïakynduh ba dang shen ïa u Myntri kam pohïing namar ka jingkhie ka kam umsnam ha Ri Bangladesh.
“Nga la ïoh ïa ka jubab kaba shai bad ka khubor na u (Amit Shah) ba yn ym shah iano ïano ruh ban wan rung na ki khappud jong ngi” ula ong haba bynrap “Kawei-artylli ki jingjia rung tuh ki lah ban jia hangne hangtai hynrei ngin ym ïohi satia ïa kano kano ka jingwan rung ba bun ki briew na Ri Bangladesh”.
Halor ka kam ker sainar ha khappud, u Conrad ula ong ba ka Sorkar ka tip bha halor ki kam ba ïadei bad ki khappud bym pat ker sainar, kaba long haduh 40-50 km ha ki jaka khappud bad ka Bangladesh.
“Ha ka por ba jia ha huri hura ha Bangladesh, kila don bun tylli ki jingïalang kynthup ha ka kyrdan jong ki BSF, ki shipai bad ki Pulit ka Jylla bad kumjuh ruh ha ka kyrdan jong nga bad ka kyrdan u DyCM ruh kumjuh” ula ong.
