Shillong, Nailur, 04: Ka Sorkar Meghalaya bad Assam ki la rai ban thaw da ka Joint Committee ban peit ïa ki mat ha kaba ïadei bad ka University of Science and Technology, Meghalaya (USTM).
Haba pyntip ïa kane ha ka sngi Balang, u Myntri Rangbah ka Jylla u Conrad K Sangma u la ong, “Ma nga bad u Myntri Rangbah ka Assam ngi la rai ha ka jingïakren ba ngin thaw ïa ka Joint Committee kaba rit ha kaba ki ophisar na baroh ar tylli ki jylla kin don lang bad ngin peit ïa baroh ki liang kiba la pynpaw da ka Assam bad kiwei bad hadien kata ngin khmih lang ïa kiwei ruh ki kam.”
U la ong ba ki Chief Secretary jong ki ar tylli ki jylla ki don bynta ban thaw ïa kane ka komiti. “…ïa kine ki jingeh baroh yn sa ïakren bad ngi kyrmen ba ngin dup lah ban pynbeit ïa kiba bun ki jingeh,” u la ong.
Haba kylli, u Myntri Rangbah u la ong ba ka Sorkar ka la ïoh ïa ka jingtip ba thikna hadien ka jingïakren jong u bad u Myntri Rangbah ka jylla Assam.
“Ngi kyrmen ba la kumno kumno hapoh shi taiew kane ka komiti kan treikam noh mardor,” ula ong.
