Yn kyndang naphang ïa ki kam sniew ha Iewduh, rai ka Public Safety & Security Committee

Shillong, Nailur 14 : Ka komiti kyrpang kaba la thaw da ka KHADC na ka bynta ban peit ïa ka jingshngaiñ bad ka jingkhuid jingsuba ha Iewduh ïa kaba la tip kum Committee Cleanliness and Public Safety and Security at Ïewduh and Adjourning Localities, ka la kynduh lang hynne ka sngi ryngkat ki rangbah shong ba marjan ka ïewduh kiba kynthup ïa ka Mawkhar, Umsohsun, Wahthapbru, Qualapatty, Misson, Wahhingdoh Riatsamthiah bad kumjuh ruh ïa ka Hynñiewtep Ïewduh Association.
Nalor kitei ki shnong, ha katei ka komiti la kynthup ruh ïa ka bor pynïaid District bad ka tnad pulit kumjuh ruh ka Hima Mylliem.
Ha Kane ka committee ka KHADC kala rai ban mang pisa lyngba ka Council ban pynbhabriew nalor ka jingshong suk shong shngaiñ ka ïewduh kiba kynthup ban shna thymmai ïa ki paiñkhana bad pynbha ïa kiba la don lypa, ban maramot ïa ki lynti ïaid kjat, ban shna ïa ki nala pyntuid jaboh bad ban buh ïa ki solar light kiba pynïeng ha ki surok ki lynti ban ai jingshai ha ka por mynmiet. La rai ruh ban pyndait ïa ki kor CCTV camera ha ki jaka ba dei ban buh ban pynduh ïa ki kam tuh hapoh ïew.
U Bah Pynïaid Sing Syiem CEM ka KHADC haba kren sha ki lad pathai khubor u la ong, “Hadien ba ka Council dang shen ka la leit ban jurip ïa ka Ïewduh ngi la rai ban thaw da ka komiti kaban peit bad khmih na ka bynta ka shongsuk shong shngaiñ ha Ïewduh, ki shnong ba marjan bad ruh ka khuid ka suba. Kane kadei ka komiti kaba nyngkong bad ngi la shim ïa ki katto katne ki rai hadien ba ngi la ïatai ïathir bad ruh lyngba ki jingai jingmut na ki dkhot”.
U CEM u la ïathuh ba halor ka khuid ka suba ka komiti ka la rai ban shna thymmai ïa ki paiñkhana nalor ka jingpynbha ïa kiba lah don lypa, ban shna pynbha ïa ki nala pyntuid um bad ki lynti ïaid kjat ha baroh kawei ka Ïewduh.
Kawei pat ka rai ba kane ka komiti ka la shim ka long halor ha shongsuk shong shngaiñ ha ka leit ka wan ha Ïewduh ha kaba la rai ban thied ïa ki solar street light ha ki lynti ïaid kjat katkum ka jingibit ka Hima Mylliem bad ki DS ban buh ïa ki. Nangta ban thied ïa ki kor CCTV ban pyndait ha Ïewduh bad ha ki shnong ba marjan jong ka.
Bad ïa kine ki jingdonkam ka komiti ka la aiti ha ka EC ba kan mang kyrpang na ka bynta ban pynlut ïa baroh ki jingdonkam lyngba ka 15th Finance Commission.
U CEM u la ïathuh ruh ba ka komiti ka rai ban pynduh jait noh ïa ki jingsniew hapoh Ïewduh da kaba ym shah shuh ïa ki briew ban shong be-aiñ bad ban kyndang ïa ki dukan kyiad be-aiñ.
“Ka komiti ka la rai ban pynduh jait noh ïa ki jingsniew kiba ju jia na ka por sha ka por hapoh Ïewduh bad la rai ban ym shah shuh ïa ki briew ba shong be-aiñ hapoh ïewduh bad ban khang noh ïa ki dukan kyiad be-aiñ namar na kine ki ju mih ki jingïaklumar, ïashoh ïadat bad ki jingjia ba poi sha ki jingmynsaw,” la ong u CEM
Khatduh ka komiti ka la shim ïa ka rai ban buh noh da ka khyrdop rung bad khyrdop mih jong ki paidbah hapoh Ïewduh da kaba buh da ki nongap pahara naduh ka por myn sngi haduh ka por mynmiet.