Yn khlieh u President barim ka ri ïa ka Komiti ban pynlong elekshon lang ka Parliament bad ki Assembly
![](https://mawphor.com/wp-content/uploads/2023/03/Parliament.jpg)
New Delhi, Nailur 01: U President barim jong ka ri India, u Ram Nath Kovind, un long u Chairman jong ka Komiti ka ban peit ïa ki lad ki lynti na ka bynta ban wanrah ïa kata ka One Nation One Election lane kata ka elekshon ban long lang ha kajuh ka por na ka bynta ka Lok Sabha bad ki Assembly.
Ka Sorkar Pdeng ka la thung ïa u Kovind ha ka sngi Thohdieng, shi sngi hadien ba ka la pynbna ba kan don ka Special Session ne ka Dorbar kyrpang naduh ka 18 haduh ka 22 tarik mynta u bnai.
Bun ki lad pathai khubor ki la pynpaw ba ka sorkar NDA ka lah ban wanrah ïa ki katto katne ki Bill ba donkam ha kan ka Dorbar Kyrpang bad kawei na kine ki Bill ka lah ban dei ka One Nation One Election Bill.
Ki khubor ki la paw ha ri India mynta ka sngi ba kane ka jingpynlong lang ïa ka elekshon Parliament bad Assembly kam dei kaba dang thymmai,namar namar haduh u snem 1967, ka elekshon MP bad MLA ka long lang ha kajuh ka por. Hynrei ki don ki snem ha shuwa u 1967, haba ki don ki Assembly ne ki ïingdorbar Thawaiñ kiba shah pynwait noh shiteng por ne shiteng samoi. Nangta, ka Lok Sabha ruh ha u snem 1970, kata, shi snem shuwa ban kut ka samoi treikam ka la shah pynwai noh. Dei namar kane ka daw ba ki don ki jylla kiba hap ban pynlong noh ïa ki elekshon khlem da ap lang ia ka samoi jong ka Lok Sabha bad naduh katei ka snem, ka elekshon MP bad Assembly ki la long noh la ka jong ka jong ka snem.
Hynrei ka BJP kaba ïalam ïa ka sorkar NDA, ka la pynpaw ka jingangnud ban don biang ka elekshon kaba kum kane bad dei namar kane ka daw ba ha ka Election Manifesto ka la buh ïa kane ka mat ha ka elekshon ha u snem 2014.
U Myntri Rangbahduh jong ka ri India u Narendra Modi ruh u dei uba kyrshan bha ïa kane ka ‘One Nation, One Election’ da kaba pyni ba kan pynduna shibun ka jinglut, ym tang ïa ka Sorkar, hynrei îa ki Political Party ruh kumjuh.
Hynrei kane baroh kan shai tang ha ka Special Session bad ka jingthung ka Sorkar Pdeng ïa kane ka Komiti ka kdew shai ba ka thmu shisha ban pynurlong ïa kane.