Yn ïoh pdiang ki 18 shnong ïa ka skhim umbam umdih na ka Nongpoh Combined Water Supply scheme

Nongpoh, Naiwieng 28: Kan long ka jingkyrkhu kaba khraw ïa ki 18 tylli ki shnong ba hap ha ka thaiñ Nongpoh, ha kaba lyngba ka Nongpoh Combine Water Supply Scheme, kine ki shnong shen kin sa ioh pdiang ïa ka umbam umdih ba ka sorkar lyngba ka tnad PHE kan sa pynpoi ïa ka umbum umdih ha man la ki shnong.
Ïa kane ka jingioh pdiang kitei ki 18 shnong ïa ka umbam umdih la pynpaw hi ruh da u MLA ka Nongpoh, u Bah Mayral Born Syiem, haba kren ha kawei na ka jingïalang paidbah ha Nongpoh.
Kitei ki Shnong ki ban sa ioh pdiang ïa ka umbam umdih ki kynthup naduh ka shnong Mawtnum ter ter haduh ha Shnong Shangbangla ba kynthup ïa ki 18 tylli ki shnong ba la mang kyrpang lyngba kane ka skhim ba ka jingthmu ka long ban pynpoi ïa ka umbam umdih ha man la ki shnong.
La ïathuh ruh ba kane ka Nongpoh Combined Water Supply scheme ka la kot da ki klur tyngka bad shen ka sorkar lyngba ka tnad PHE kan sa pyntreikam noh ïa kane ka skhim, ha kaba lada lah shisha ban pynpoi um ha man la kitei ki 18 shnong ka jingkyrkhu ka long ïa ki paidbah Nongshong shnong.
Kumba la pynpaw da u MLA ka Nongpoh, u Bah Mayral Born Syiem la ïathuh ba kane ka jingthmu ban pynpoi um sha kitei ki 18 shnong ka la don mynta hapdeng ka jingpynkhreh ban pyntreikam ïa ka scheme bad na ka liang jong u kum u Nongmihkhmat ruh un sa dang buddien ban pynsted ïa ka kam khnang ba bun ki shnong ba kyrduh ïa ka umbam umdih kin lait noh na ka jingkyrduh ïa ka umbam umdih, hadien ba la dep ban pyntreikam ïa katei ka Nongpoh Combined Water Supply scheme, u la bynrap.