Pynbna ka ophis Civil Sub-Division ïa ka jaka ban shna ïa ka Sub Fire Station ha Amlarem
Jowai, Naiwieng 28: Ka ophis jong ka Addl. Deputy Commissioner, Amlarem Civil Sub-Division, Amlarem West Jaiñtia Hills District ha ka kyrwoh khubor ba la phah la ong kumba ka sorkar Meghalaya ka pynbna ba ka jaka kaba don ka jingheh kumba 3952.38 sq meters eiei yn donkam ha shnong Amlarem na ka bynta ka jingdonkam u paidbah, kata ban buh ïa ka Sub-Fire Service Station katkum ki pud sawdong.
La pynbna katkum ki kyndon ka Section 11 (1) jong ka Right to Fair Compensation and Transparency in Land Acquisition, Rehabilatation and Resettlement Act, 2013 (Act No.30/2013) sha baroh kiba don jingïadei ba kane ka jaka. Ïa ka plan jong kane ka khyndew lah ban leit jurip ha ka ophis jong ka Sub-Divisional Collector Amlarem, West Jaiñtia Hills District ha ki sngi ba long trei. Ka sorkar kala aibor ïa ka Additional Deputy Commissioner, (Revenue) i/c Civil Sub Division, Amlarem bad ïa ki nongtrei jong ka ophis ban rung ne mih sha kane ka jaka bad ban thew ne who sha kane ka jaka, ban tih ne ksam ïa ka khyndew bad ban leh ïa kano kano ka kam kaba donkam ha ka ban pyntrei ïa ka, katkum ba la kdew bad pynshai ha ka Section 12 jong katei ka Aiñ.
Katkum ka section 11 (4) jong ka Aiñ, la khang pyrshah ïano ïano ban leh ïa kano kano kam lane ban ïadie ïathied ïa kane ka jaka naduh ka tarik bala pynmih ïa kane ka jingpynbna (Notification) khlem da ïoh jingbit na ka Additional Deputy Commissioner, (Revenue) i/c Amlarem Civil Sub-Division, Amlarem.
Ka sorkar kala aibor ban thung ïa ka Additional Deputy Commissioner, (Revenue) i/c Civil Sub-Division kum ka Administrator na ka bynta ban pynkynriah bad ai jaka shong (Rehabilitation and Resettlement) ïa ki briew kiba shah ktah.
Lada don kano kano ka jingujor halor kane ka jingshimnoh ïa kane ka jaka ki lah ban phah ïa ka jingujor jong ki hapoh 60 (hynriew phew) sngi naduh ka tarik ba la pynmih ïa kane ka jingpynbna (Notification) katkum ka Section 15 jong katei ka aiñ haneng sha ka Additional Deputy Commissioner, (Revenue), i/c Amlarem Civil Sub-Division.
Na ka bynta u Pud sawdong ban shna ïa ka Sub-Fire Station ha Amlarem West Jaiñtia Hills District ki long kumne shatei: PWD surok Muktapur, Mihngi: jaka jong ka Queen Talang & Het Surong, Shathei: Jaka U Hoimon Rynjah, Sepngi: Jaka ka Nilbi Talang.