Yn ïoh jinghikai ki volunteer halor ki kam ai jingïarap haba jia ki jingshah pynjulor ha ki bor mariang
Shillong, Jymmang : Ki volunteer na ki kynhun nongshong shnong kin ïoh pdiang ïa ki jingai jinghikai ha ka ba ïadei bad ki kam aijingïarap ha ba jia kino kino ki jingjia shah pynjulor ha ki bor ka mariang bad kiwei pat lyngba ka skhim “Upscaling Aapda Mitra” na ka bynta ka East Khasi Hills District, ïa ka ba la plie hynne ka sngi da I Kong D. Phawa, ADC & CEO, District Disaster Management Authority (DDMA), EKHD ha ka jingïalang kaba la long ha Central Training Institute, Mawdiangdiang ha ka jingïadon lang I Kong P. Lyngba, DDMO,EKHD, Kong B. Kharkongor, Commandant, CTI nalor kiwei pat.
Kane ka “Upscaling Aapda Mitra scheme” ka dei ka ba la pyntreikam bad bei tyngka da ka National Disaster Management Authority (NDMA) ha ryngkat ka jingïatreilang bad ka State Disaster Management Authority (SDMA) ha ka ba haduh kumba 200 ngut ki volunteer na ki kynhun nongshong shnong na kylleng ki jaka kynthup ïa ki dkhot NSS, NYK, Bharat Scouts and Guides bad ki samla pule kolej jong ka East Khasi Hills kin ïoh ïa ki jinghikai ha ka ba ïadei bad ki sienjam ban aijingïarap ha ba jia kino kino ki jingjia na ka jingshah pynjulor ha ki bor ka mariang.
Ha ka jingkren plie ïa ka prokram I Kong D.Phawa I la ong ba ka thong jong kane ka skhim ka long ban khmih halor ka jinglah bad ka jingtbit jong ki volunteer hapoh ki shnong ki thaw namar ki dei ma ki, ki ba don hakhmat eh ha ba jia kino kino ki jingjia shah pynjulor ha ki bor ka mariang bad kiwei pat khnang ba kin lah ban tehlakam bad ban ai jingïarap.
Shi bynta jong kane ka skhim, na ka liang jong I Kong Phawa I la pyntip ba ka District Disaster Management Authority (DDMA), EKHD kan pynlong ïa kane ka jingai jinghikai ha ki hynriew tylli ki batch ne kynhun ka ban don kumba 30 haduh 35 ngut shi kynhun ki volunteer.
ïa kane ka jingai jing hikai yn lamkhmat da ki riew shemphang na ka tnat State Disaster Response Force (SDRF) nalor ki riew shemphang da kiwei kiwei apt ki tnat sorkar, kumta na ka tnat Fire & Emergency Services.
Hadien ba la pyndep ia kane ka jingai jinghikai, kine ki volunteer kin ioh pdiang ia ki tiar jingiada bad kiwei pat kum ki life jacket, jingtbeh (torch), gloves, tarik, tiar aijingsumar, jingpulit, ki bilor um, musari, ki T shirt ki ba don ia ka shap jong ka NDMA ki helmet bad kiwei kiwei pat.