EGYPT, Jymmang 30: U Mohamed Salah, u nongïalehkai ba kynsai jong ka Liverpool, un long u nongïalam (kapten) jong ka kynhun ba khatduh jong ka Egypt, na ka bynta ka FIFA World Cup 2026 ka ban long ha USA, Canada bad Mexico, ha u bnai ban wan, ong u coach u Hossam Hassan ha ka sngi Saitjaiñ.
Ka kynhun ïalehkai ka la don tang khyndiat ki jingpynkylla, lait noh tang ka jingpynrung ïa u rangïalehkai ba dang kiew bha u Hamza Abdel Karim. Utei u rangïalehkai ba dang 18 snem ka rta, u dei uba la shah shim wai (on loan) na ka klob ba radbah jong ka ri Egypt ka Al Ahly sha ka Barcelona Atletic, kaba dei ka kynhun reserve jong ka lahduh ka La Liga.
La khmihlynti ba u Omar Marmoush jong ka Manchester City, uba la thep 8 kol ha ki 36 tylli ki jingïakhun na ka bynta ka klob jong u mynta ka samoi, un ïalam ïa ka kynhun ki rangïalehkai ba shakhmat jong ka Egypt ha kane ka lympung.
Ka Egypt kan sdang ïa ka jingïalehkai jong ka ha ka World Cup pyrshah ïa ka Belgium ha ka 15 tarik Jylliew ha Seattle na ka Group G, ba kynthup ruh ïa ka New Zealand bad ka Iran.
Ka kynhun kan ïalehkai ïa ka jingïalehkai paralok kaba khatduh pyrshah ïa ka Brazil ha ka 06 tarik u Jymmang ha Ohio.
Ka thup kyrteng jong ka Egypt na ka bynta ka FIFA World Cup 2026:
Rangap- kol: Mohamed El-Shenawy, Mostafa Shobeir, El-Mahdi Soliman, Mohamed Alaa
Rangap-dien: Mohamed Abdelmonem, Mohamed Hany, Yasser Ibrahim, Hossam Abdelmaguid, Ahmed Fattouh, Tarek Alaa, Rami Rabia, Hamdi Fathi, Karim Hafez
Rangïalehkai Pdeng madan: Mohamed Salah, Marwan Attia, Ahmed Mostafa “Zizo”, Mahmoud Hassan “Trezeguet”, Emam Ashour, Mostafa Abdel Raouf, Mohannad Lasheen, Haitham Hassan, Mahmoud Saber, Ibrahim Adel, Nabil Emad
Rangïalehkai ba shakhmat: Omar Marmoush, Hamza Abdel Karim.
