Shillong, Naitung 15: U Nongïalam ka BJP bad u Myntri ka sorkar jylla u Bah AL Hek u la ïathuh lypa ba ka party jong u kan sa ïalam ïa ka sorkar ha Meghalaya ha u snem 2028.
Katkum ka jingong jong u, ka party ka la sdang ka jingpynkhreh bad ki kam ki la ïaid na ka bynta ka elekshon 2028 bad ka la buh ka thong ban wanrah ka jingjop halor kane ka bynta.
“Kan dei ka sorkar ba ïalam da ka BJP ha u snem 2028,” ïathuh u Bah Hek sha ki lad pathai khubor ha ka sngi baar.
“Ngin sa don ki kyrtong kiba biang bad ngi don ruh ka seng kaba khlaiñ ha ka jylla bad ka BJP kan pynkhreh ïalade na ka bynta 2 ne 3 snem ha shwa ka election,” u la ong.
Haba kylli, u Bah Hek u la ong, “Ngi la sdang ka jingpynkhreh naduh mynta ym tang ha ki por election. Ka BJP ka la trei manla ka sngi ban pynthikna ba kan ïoh ka jingjop ha ka elekshon 2028, kaba ngi la khmih lynti ba ka BJP kan ïalam ïa ka sorkar.”
Halor ka jingpynlong ïa ka elekshon sha GHADC ha u snem 2026, u Bah ong ba ka dei ka jingkitkhlieh jong kano kano ka political party ban jied ïa ki kyrtong na ka bynta kane ka election.
U la kyntait ruh ban kren halor ka jingdon ka lyer ka BJP ha kane ka thaiñ, da kaba kdew ïa ka jingkiew ka party na ka jingdon 2 ngut ki 2 MP ha u snem 1984 sha palat 200 ngut ki MP mynta.
“Kadei ka jingkitkhlieh jong kano kano ka political party ban jied ïa ki kyrtong na ka bynta kano kano ka election. La ka long na ka bynta ka MP, MLA ne MDC ne municipal, ka party kan hap ban buh ki kyrtong ban ïakhun ïa ki elekshon,” ong u Bah Hek.
Haba kylli ïa ka jingshisha ba ka lyer ka BJP ha Garo Hills kam da long kaba bha, u la jubab da kaba kylli, “Mano ba ong ïa phi ba ka lyer ka seng kam da bha? Da kano ka lynti ba phi ong ba ka seng kam khlaiñ sha kane ka thaiñ?”
“Ka BJP kam da don bun ki MDC ha GHADC, kane kam don ka jingïapher. Nga kynmaw ha ka por ba ngi sdang ïa ka BJP ha ka snem 1984, ka party ka don tang arngut ki MP hynrei mynta ngi la don palat 200 ngut ki MP ha parliament. Kane kadei ka politic. Ngim lah ban ïathuh lypa. Ka BJP ka la leh bha ha baroh kawei ka ri. Kane ruh kan ym jngai shuh na ka bynta ka Meghalaya bad kiwei ki jylla ka thaiñ shateilammihngi kumjuh,” u la ong.
Halor ka jingkylli ba kam shym la don ka jingktah wat ki jingpyrshang ka BJP ban ïoh rung khlieh ha Meghalaya, u Bah Hek u la ong, “Lada kam don ka jingktah ha kawei ne artylli ki election, ngi hap long kiba ïaishah khnang ba ha kawei ka sngi ngin sa lah ban ïoh jingjop.”
“Balei ngi hap ban sangeh noh? Ka jingpulom ka dei u mawjam sha ka lynti ka jingjop,” u la pynpaw.
