SOHRA, Lber 28: Ka kynhun ïalehkai jong ka Combine SHG bad ka Ribhoi Office Combine ki la lah ban jam shakhmat sha ka wat ïakhun ba khadtduh (final) ha ka lympung Inter Office Cum Corporate League T20 Cricket Tournament 2025, ba la pynïaid da ka East Khasi Hills Cricket Association [EKHCA].
ïa kane la pynthikna hadien ba kine ki arliang ki la jop ïala ki jong ki jingïakhun semi final kaba la long ha ka sngi Thohdieng (28 tarik, Lber 2025), ha kaba ka Combine SHG ka la pynliem ïa ka MLP Sohra da 29 ron ha ka jingïalehkai kaba nyngkong, nangta ka Ribhoi Office Combine ka la jop da 4 wiket ïa ka PHE Sohra Division ha ka jingïalehkai kaba bud.
Haba phai sha ka jingïakhun, ka Combine SHG ka la shimti ban tied nyngkong hadien ba jop ïa ka jingkynting pisa (toss) bad ka la lah ban kamai 158/5 haduh kaba kut jong ki 20 ober ba la mang. U E Nathan A Diengdoh u la long uba kongsan tam ha ka tied da kaba khyrwit haduh 74 ron naki 58 tylli ki bol, katba u Stevenson Syiem (jong ka MLP Sohra) u la khur 2/22 naki 4 ober.
Watla ka MLP Sohra ka la lah ban tied pyndep ïa ki 20 ober hynrei kam shym la poi satia sha ka thong ba la buh namar ba ka la shah khanglad noh da tang 129 ron bad khyllem 6 wiket. U Albinus Syiemiong u la kamai 49 ron naki 36 bol. U Sunny Sten u la khur 2/10 naki 4 ober, hynrei ïa ka nam Player of The Match la khur da u E Nathan A Diengdoh.
Ka semi final kaba bud la sakhi ïa ka PHE Sohra Division kaba la buh ïa ka thong da 162/8 haki 20 ober, bad u Sandy Kharshandi u la lah ban kamai 65 ron naki 43 bol.
U Wansuklang Shullai u la long uba seisoh tam napdeng ki rangkawang bol jong ka Ribhoi da kaba khur 4/20 haki 4 ober, shuwa ba ka kynhun kan jubab pyndep da kaba kamai 163/5 tang haki 13.5 ober ban khur ïa ka jingjop.
U Probeson Bey u la long uba kongsan tam ha ka tied da kaba kamai 44 ron naki 23 bol ban khur syndon ruh ïa ka nam Player of The Match.
Kumta, kine ki ar kynhun ba dang sah, ka Combine SHG bad ka Ribhoi Office Combine kin hap ban ïa tynjuh bor ha ka final na bynta ka nam lahduh, kaba la buh ban long ha ka 31 tarik Lber, 2025, ha ka por 10 shiteng mynstep.
