Shillong, Mar 28: Hadien ka jingïakhun ba hynriew sien kynthih shabar, ka kynhun ïalehkai jong ka Shillong Lajong FC ka la wanphai biang sha la ïing bad kan aireng pyrshah ïa ka Aizawl FC ha ka wat ïakhun kaba 21 ha ka lympung I-League 2024-25 ha madan First Ground, kaba ha SSA Stadium Polo, mynta ka sngi Saitjaiñ. Ka jingïalehkai kan sdang ha ka por 7 baje janmiet.
Ka jingïoh kamai point ka la long kaba duna bha ïa ka Lajong na kine ki hynriew tylli ki jingïalehkai ba ka ïakhun shabar, ha kaba ka la ïoh ban kamai tang 4 poiñ, da kaba ïakhaid bad ka Dempo SC da mar 2-2 kol ha ka 19 tarik Rymphang bad kaba jop da 4-3 kol ïa ka Gokulam Kerala FC ha ka 03 tarik u Lber. Ka la mad namrem haduh saw sien.
Ki lai tylli ki jingïakhun ba khatduh baroh ki la kut ha ka jingshah rem, kiba kynthup ïa ar tylli ki jingïalehkai ba ka la rem kput ha ka Churchill Brothers (6-1 kol) bad ha ka Rajasthan FC (4-0 kol), katba ka jingïalehkai kaba khatduh ka la rem da 2-1 kol ha ka Inter Kashi.
Ka Lajong kaba don ha ka kyrdan kaba 8 mynta kan don ïa ka kabu kaba paka ban ïoh ïa ka jingjop namar ba ka Aizawl kaba dei ka lahduh barim (kaba duna 3 poiñ kham poh) ka la mad ïa ka samoi kaba jwat bad kaba sniew tam bad mynta ka don ha ka thup kyrdan ban shah sloit lane relegation zone.
Ha ka por ba kine ki arliang mamla ki la ïakynduh ha ka jingïakhun ba nyngkong ha u bnai Kyllalyngkot, ka SLFC ka la long ka nongjop ha Aizawl. Ha ki san tylli ki jingïakhun I-League ba kine ki arliang ki la ïakhun ha Shillong, ka Aizawl ka la pynliem tang shi sien ïa ka Lajong, ha ka samoi lehkai 2023-24.
Ka Lajong ka long kaba la shngaiñ lypa mynta ka samoi hynrei ka lah ban pyndep tang haduh ka kyrdan kaba hynriew ha ka miej, kane ka shong katkum ka resol jong ki kynhun ba ïajan point bad ka. Ka jingialehkai mynta ka sngi kan long kaba kongsan ha ka jingïakhun ban lait na ka thup kyrdan shah sloit. Katba ka Delhi FC kaba don ha trai duh la thikna ba kan pyndep ha ka thup ban shah pynhiar kyrdan, ka SC Bengaluru bad ka Aizawl kin dang pyrshang ban ïakhun ban kiar na kajuh ka jingshah pynhiar kyrdan.
Ka SC Bengaluru, kaba kamai 20 point, ka lah ban pynim ïalade da kaba jop ïa ka Namdhari FC la sngi U Blei, kata ka long tang lada ka Aizawl – kaba kamai 19 point – kan mad ïa ka namrem ha ka Lajong mynta ka sngi.
