Jowai, Risaw 01: Ka lympung ïalehkai phutbol bala tip kum ka (L) Kesilroy Pala Invitation Football Tournament 2023 bala pynïaid da ka West Jaiñtia District Sports Association (WJDSA) ka la sah mynta satang shi sien ïakhun ban rai ïa lahduh jong ka lympung hadien ba ka Salaroh FC ka la jop ha ka jingïakhun semi final kaba ar kaba la long ha kane ka Sngi saitjaiñ ha madan Kiang Nangbah Stadium, Dongmihsngi Jowai.
Haba phai sha katei jingïakhun Semi Final ba ar jong kane ka lympung na ka liang ka Salaroh FC kala lah ban pynliem salit da shikol (1-0 kol) ïa ka Rymbai Shkenshynriah.
Ïa katei ka kol na ka Salaroh FC la thep da u Apbor Kurbah haka minit ba 103 kaba la biang pura ban ïalam ïa ka kynhun sha ka final.
Lyngba kane ka jingjop jong ka Salaroh FC kan sa ïoh ban ïakhun pyrshah ïa ka Mukhla FC ha ka jingïaknieh ïa ka nam lahduh jong kane ka lympung mynta u snem.
ïa ka jingïakhun final hapdeng kine ki ar kynhun la pynkhreh ban pynlong ha ka 7 tarik u Risaw, 2023, kaba hap ha ka Sngi Saitjaiñ, bad ka por kan long 2 baje nohphaisngi.
