Shillong, Risaw 01: Ka kynhun ïalehkai jong ka Tura District Cricket Association ka la lah ban sei madan ïa ka sap kaba kyrpang ha ka sngi ba kongsantam ban rah syndon ïa ka burom jong ka Meghalaya Cricket Association’s U-19 Boys Inter District Cricket Tournament 2023 ha Salpara, Mendipathar, hynnin ka Sngi Saitjaiñ ban jop da hynriew wicket pyrshah ïa ka East Garo Hills DCA.
Haba phai sha ka East Garo Hills, ka la long ka kynhun kaba jwat ban pynliem ha kane ka samoi, hadien ba ka la jop baroh ki jingïalehkai na ka Group Stage- kiba kynthup ruh ïa ka jingïakhun pyrshah ïa ka Tura – shuwa ban pynkhyllem ïa ka Shillong Cricket Association A ha ka semifinal ha ka sngi Thohdieng hynrei ka jingïaknieh namlahduh hynnin ka sngi kam shym la long kaba seisoh ïa kane ka kynhun.
Ka jingïakhun ha kane ka final ka la ïasyriem bad ka semi, ha kaba ka thong ban jop ka long kaba duna hadien ba ka EGH ka la shah pynhap baroh ki wicket bad kamai tang 89 ron naki 32 over hadien ba ka la jied ban tied nyngkong mar ïa jop ïa ka toss, katba na ka liang jong ka TDCA ka la pyndep ban kynjoh pura ïa ka ron kaba donkam bad hap tang saw wicket bad pynsah sa 10.1 over.
Ha kane ka jingïakhun final, dei u Chandra Thapa u rangkawangbol u ba la wanrah jingma tam, da kaba khur 3 wicket bad tang 18 ron na ki 8 over, ha kaba u wei napdeng ki rangtied ba u la ïoh pynhap u dei u player ba kamai bun ron tam na bynta ka East Garo Hills, u Thunun N Marak, u ba la shah pynhap noh tang hadien ba ka kynhun ka la kynjoh sha ka 20 ron. Napdeng ki rangtied jong ka EGH, dei tang u Lensbirth N Marak, u ba la lah ban kynjoh sha ka phew ron, kata da 16 ron shuwa ban shah pynhap noh ha u Ben Haden N Marak (2/21 naki 7 overs). Katba na ka liang jong u Yash Mishra, u la ïoh ban khur 2/12 naki 3 over.
Haba beh ïa ka thong, na ka liang jong ka TDCA, ka donkam tang 29.5 over na ki 40 over ban kynjoh sha ka ron ba la buh.
Na bynta kane, ka jingïaroh ka long sha u Shahin Alom, u ba la khyrwit haduh 42 ron na ki 43 bol lyngba ki saw tylli ki four bad saw tylli ki six. U la shah pynhap noh ha u Gulgul Sangma (2/16 naki 7.5 overs), kaba la pynlong ïa u Ben Haden ban ïoh ïa ka nam kum u player ba khyrwit ïa ka ron ban pynjop na bynta ka kynhun.
Ki ba la don ryngkat ha kane ka sngi ki kynthup ïa ki dkhot ba la rangbah jong ka MCA bad ki dkhot nongkitkam jong ki District Cricket Association bad ïa ka trophy sha ka Tura DCA la aiti da u President jong ka MCA, u Naba Bhattacharjee katba ïa ka trophy na bynta ka kynhun ba wan ba ar (runners-up) la aiti da u Joint Secretary ka MCA, u Chiang D Shira sha ka East Garo Hills-DCA.
