Shillong, Nailur 8 : Ka Bharatiya Janata Party (BJP) ka la rai ban ïakhun ïa ki election MDC sha baroh lai tylli ki Autonomous District Council hapoh ka jylla kata ha Khasi, Jaintia bad Garo.
“ Ngin ïa khun ïa ki election MDC sha baroh lai ki ADC kata sha ka KHADC,JHADC bad GHADC. Tangba ngim pat thikna ne ym pat rai la ngin pynïakhun ha baroh 29 tylli ki constituency jong man la kawei kawei ka ADC “ ong u bah A.L Hek uwei na ki nongïalam ka BJP bad myntri ha kane ka sorkar jylla.
“ Halor kane ngin hap ban bishar shwa ïa ki kyrtong la ki don ne em kiba pan tiket ban ïakhun na baroh ki constitency nalor kata ngin ai tiket ruh ïa kito ki kyrtong kiba thikna ban jop. Namar ngim lah ban shu ai tiket ruma kat ïa kiba pan tiket hap ban da bishar bniah bha ” ong biang u bah Hek.
Ka jingpynjlan por ia ka KHADC bad JHADC ka la kut ha ka 5 tarik mynta u bnai bad ka sorkar ka la pynjlan por biang sa hynriew bnai ïakine kitei ki ar tylli ki ADC. Ka sorkar ka la buh thong ruh ba ïa ka election MDC sha baroh ar ki ADC yn pyndep lut nadong shadong hapoh u bnai Lber jong u snem ban wan.
